Yaxın Şərqdə gərginliyin yenidən artdığı bir vaxtda sosial şəbəkələrdə və beynəlxalq mediada yayılan görüntülər ABŞ-nin hərbi hazırlıqları ilə bağlı müzakirələri gücləndirib. Videolarda ABŞ Hərbi Hava Qüvvələrinə məxsus yanacaqdolduran təyyarələrin İsrailin Ben-Qurion hava limanında yerləşdirildiyi görünür.
Korrekt.az xəbər verir ki, hərbi ekspertlərin fikrincə, KC-135 Stratotanker və KC-46 Pegasus tipli yanacaqdolduran təyyarələr uzaqmənzilli döyüş aviasiyasının fəaliyyətini dəstəkləmək üçün istifadə olunur. Belə təyyarələr qırıcıların və bombardmançıların havada yanacaqla təmin edilməsinə imkan verir ki, bu da mümkün hərbi əməliyyatlarda mühüm rol oynayır.
Bununla yanaşı, yayılan videoların ABŞ-nin İrana qarşı yaxın zamanda hərbi əməliyyata başlayacağına dair qəti sübut olduğu təsdiqlənməyib. Rəsmi Vaşinqton və Təl-Əviv məsələ ilə bağlı hər hansı yeni əməliyyat planını açıqlamayıb.
Qeyd edək ki, son aylarda ABŞ-yə məxsus onlarla yanacaqdolduran təyyarənin Ben-Qurion hava limanında yerləşdirilməsi beynəlxalq medianın diqqət mərkəzində olub. Daha əvvəl İsrail mətbuatı bu təyyarələrin bir hissəsinin sonradan regiondakı digər bazalara köçürüldüyünü yazmışdı.
Hazırda bölgədə ABŞ və İran arasında gərginlik yüksək səviyyədə qalır. Analitiklər hesab edirlər ki, hərbi aviasiyanın aktiv hərəkəti daha çox ehtiyat tədbirləri və mümkün ssenarilərə hazırlıq xarakteri daşıyır. Bununla belə, rəsmi təsdiq olmadan bu cür görüntüləri ABŞ-nin müharibəyə başlayacağına dair qəti sübut kimi qiymətləndirmək doğru deyil.
