Almaniya Ukraynanın müdafiə imkanlarını gücləndirmək məqsədilə 50 min ədəd FPV hücum dronunun alınmasını maliyyələşdirəcək.
Korrekt.az xəbər verir ki, bu barədə Reuters agentliyi məlumat yayıb.
Məlumata görə, bu sifariş Qərb ölkələri tərəfindən Ukrayna üçün həyata keçirilən ən böyük dron satınalmalarından biri hesab olunur. Müqavilə Ukrayna istehsalı olan Shrike FPV dronlarını əhatə edir. Sözügedən pilotsuz uçuş aparatları ABŞ-ın Auterion şirkətinin proqram təminatı ilə təchiz olunub və uçuşun son mərhələsində hərəkətdə olan hədəfləri avtonom şəkildə izləyərək zərbə endirmək imkanına malikdir.
Auterion şirkətinin baş icraçı direktoru Lorenz Mayer müqavilənin ümumi dəyərinin təxminən 90 milyon avro olduğunu bildirib. Onun sözlərinə görə, maliyyələşdirmə Avropa ölkələrindən biri tərəfindən təmin edilir. Mayer qeyd edib ki, dronların bir hissəsi artıq Ukraynaya çatdırılıb, qalan partiyanın isə ilin sonunadək təhvil verilməsi planlaşdırılır.
Şirkət rəhbəri əlavə edib ki, Auterion bu il müxtəlif istehsalçılarla əməkdaşlıq çərçivəsində və bir neçə Qərb ölkəsinin maliyyə dəstəyi ilə Ukraynaya ümumilikdə 100 min dronun tədarükünə kömək edəcək. Bu rəqəmə ABŞ Müdafiə Nazirliyinin (Pentaqon) maliyyələşdirdiyi və əvvəllər Ukraynaya çatdırılmış 33 min dron da daxildir.
Müqavilədə iştirak edən Ukraynalı istehsalçı Almaniya ilə razılaşmanın mövcudluğunu təsdiqləsə də, əlavə təfərrüatları açıqlamayıb. Almaniya Müdafiə Nazirliyi isə əməliyyat təhlükəsizliyini əsas gətirərək məsələ ilə bağlı şərh verməkdən imtina edib.
Shrike FPV dronları 2023-cü ildən etibarən Ukrayna Silahlı Qüvvələri tərəfindən cəbhə xəttində istifadə olunur. Son dövrlərdə bu pilotsuz uçuş aparatları beynəlxalq müdafiə sənayesinin də diqqətini cəlb edib.
Ukraynanın SkyFall şirkəti ilə Böyük Britaniyanın Skycutter şirkətinin birgə hazırladığı Shrike 10-F modeli ABŞ-ın Pentaqonunun 1,1 milyard dollarlıq zərbə dronları proqramı çərçivəsində də maraq doğuran layihələrdən biri kimi qiymətləndirilir.
