Avropada Təhlükəsizlik və Əməkdaşlıq Təşkilatı (ATƏT) Minsk Qrupunun və əlaqədar strukturlarının ləğv edildiyini elan edib. Korrekt.az xəbər verir ki, bu barədə təşkilatın mətbuat xidməti məlumat yayıb.
Qeyd olunur ki, ATƏT-in Minsk prosesi 1992-ci ildə Dağlıq Qarabağ münaqişəsinin həlli məqsədilə başlanıb. Proses çərçivəsində Rusiya, ABŞ və Fransanın həmsədrlik etdiyi Minsk Qrupu fəaliyyət göstərib və münaqişənin nizamlanması üçün əsas platforma olub.
ATƏT-in məlumatına görə, Ermənistan və Azərbaycan tərəfindən Finlandiya Sədrliyinə ünvanlanmış Birgə Müraciətdən sonra ATƏT Nazirlər Şurası 1 sentyabr 2025-ci il tarixində MC.DEC/1/25 saylı qərar qəbul edib. Bu qərara əsasən, 30 noyabr 2025-ci il saat 23:59-da Minsk prosesi və onun əlaqədar strukturlarının fəaliyyəti rəsmi olaraq yekunlaşdırılıb.
