Türkiyə Prezidenti Rəcəb Təyyub Ərdoğan TRT 48-ci Beynəlxalq 23 Aprel Uşaq Festivalı çərçivəsində Beştəpə Milli Konqres və Mədəniyyət Mərkəzində keçirilən qala proqramında çıxış edib.
Çıxışına uşaqları və qonaqları salamlayaraq başlayan Ərdoğan, 23 Aprel Milli Suverenlik və Uşaq Günü münasibətilə dünyanın müxtəlif ölkələrindən gələn uşaqlarla bir arada olmaqdan məmnunluğunu ifadə edib. O qeyd edib ki, bu cür görüşlər uşaqlar arasında uzunmüddətli dostluqların yaranmasına töhfə verir.
Prezident bütün dünya uşaqlarını bayram münasibətilə təbrik edərək bildirib ki, hər bir uşaq sülh və xoşbəxtlik içində yaşamaq haqqına malikdir. O, xüsusilə müharibə şəraitində yaşayan Fələstin və Livan uşaqlarına salamlarını çatdırıb.
Ərdoğan vurğulayıb ki, “Bütün səylərimizə baxmayaraq, bölgəmizdə müharibələr və vəhşiliklər davam edir. Bu müharibələrin bədəlini isə adətən günahsız uşaqlar ödəyir.”
Ərdoğan bildirib ki, Türkiyə həm regionda, həm də dünyada münaqişələrin dayandırılması, əzabların azaldılması və uşaqların qorunması üçün səylərini davam etdirir. Məqsəd bütün uşaqların sülh, təhlükəsizlik və qardaşlıq şəraitində yaşamasını təmin etməkdir.
O, uşaqların keyfiyyətli təhsil almasının vacibliyini vurğulayaraq bildirib ki, hər bir uşaq qorxu olmadan yaşamalı, bomba səsləri ilə deyil, təbiətin səsləri ilə oyanmalıdır.
Prezident çıxışında uşaqlara müraciət edərək onları ümidlərini itirməməyə çağırıb, gələcəyin onların əlində olduğunu bildirib və qeyd edib ki, onlar gələcəkdə müxtəlif sahələrdə öz ölkələrinə xidmət edəcəklər.
Sonda Ərdoğan rəqəmsal mühitlə bağlı da xəbərdarlıq edərək deyib ki, internetdə qarşılaşılan hər məlumat doğru deyil və uşaqlar bu sahədə diqqətli olmalıdırlar. O, uşaqlara həm virtual, həm də real həyatda balanslı fəaliyyət göstərməyi tövsiyə edib.
