Macarıstanda keçirilən parlament seçkilərinin nəticələri təkcə ölkə daxilində deyil, beynəlxalq səviyyədə də ciddi siyasi rezonans doğurub.
“Politico” nəşrinin təhlilinə görə, seçkilərdə Baş nazir Viktor Orbánın məğlubiyyəti həm Vladimir Putin, həm də Donald Tramp üçün siyasi itki kimi qiymətləndirilir. Bununla belə, nəticələrin Ukrayna üçün tam müsbət olmadığı vurğulanır.
Demək olar ki, bütün səslərin sayılmasından sonra “Sayğı və Azadlıq Partiyası”nın (Tisza) lideri Péter Magyarın 199 yerlik parlamentdə 138 mandat qazanacağı gözlənilir. Viktor Orbán isə məğlubiyyətini etiraf edərək 16 illik hakimiyyətinə son qoyub.
Nəşr qeyd edir ki, Orbanın hakimiyyətdən getməsi Avropa İttifaqı rəhbərliyi üçün mühüm dəyişiklik deməkdir. Belə ki, Ursula von der Leyen və António Costa artıq Aİ daxilində əsas qərarlara tez-tez veto qoyan liderlərdən biri ilə vidalaşmış olurlar. Orban uzun müddət Brüsselin siyasətinə qarşı çıxan və Ukraynaya maliyyə dəstəyi kimi təşəbbüsləri bloklayan əsas fiqurlardan biri idi.
Bununla belə, “Politico” yazır ki, bu nəticə Ukrayna üçün “acı-şirin qələbə” sayıla bilər. Belə ki, Peter Magyar daha əvvəl Macarıstanın Ukraynaya silah və maliyyə yardımı göstərməsinə, həmçinin Ukraynanın Aİ-yə üzvlük prosesinin sürətləndirilməsinə qarşı çıxıb. O, bu məsələni referenduma çıxarmağı planlaşdırdığını bildirib ki, bu da prosesin uzanmasına səbəb ola bilər.
Seçkilərin nəticələri ABŞ və Rusiya üçün də uğursuz hesab olunur. ABŞ vitse-prezidenti J. D. Vance seçkilər ərəfəsində Budapeştə səfər edərək Orbanı dəstəkləmişdi. Donald Trump da son aylarda onu açıq şəkildə müdafiə etmişdi. Lakin bu dəstək nəticəyə təsir göstərməyib və Vaşinqton Avropada əsas müttəfiqlərindən birini itirmiş sayılır.
Eyni zamanda, Vladimir Putin də Avropa İttifaqı daxilində mühüm tərəfdaşlarından birini itirib. Orban uzun müddət Moskva ilə yaxın münasibətləri ilə seçilirdi.
Seçkilərin nəticələri Avropadakı digər sağçı siyasi qüvvələr üçün də mənfi qiymətləndirilir. Xüsusilə İtaliyanın Baş naziri Giorgia Meloni Brüsseldə mühüm müttəfiqini itirmiş hesab olunur.
Qeyd edək ki, səslərin 99 faizi hesablandıqdan sonra Tisza Partiyası 138, Orbanın rəhbərlik etdiyi Fidesz Partiyası isə 55 mandat əldə edir. Ukrayna Prezidenti Volodymyr Zelenskyy artıq Peter Magyarı qələbə münasibətilə təbrik edərək, Kiyevin qonşu ölkə ilə əməkdaşlığa hazır olduğunu bildirib.
Seçicilər qarşısında çıxış edən Magyar ölkə prezidenti Tamás Sulyoku istefaya çağırıb və parlamentin buraxılmasını tələb edib. O, həmçinin ilk xarici səfərini Polşaya, daha sonra Vyanaya və Brüsselə etməyi planlaşdırdığını açıqlayıb. Məqsəd Macarıstan üçün nəzərdə tutulan, lakin hazırda dondurulmuş Aİ vəsaitlərinin bərpasına nail olmaqdır.
