ABŞ prezidenti Donald Tramp administrasiyasının gələn həftə İranla aparılan danışıqlarda mühüm diplomatik irəliləyiş əldə olunacağına ümid etdiyi bildirilir.
Korrekt.az xəbər verir ki, bu barədə Axios nəşri məsələ ilə tanış mənbələrə istinadən məlumat yayıb.
Vaşinqton İranın təklif olunan sülh çərçivəsi ilə bağlı yekun mövqeyini yaxın 24-48 saat ərzində təqdim etməsini gözləyir. ABŞ rəsmilərindən biri bildirib ki, tərəflər hələ tam razılığa yaxın olmasa da, danışıqlar davam edir.
Bəzi amerikalı rəsmilər isə Tehran administrasiyasının yekun razılaşmanı qəbul edib-etməyəcəyi ilə bağlı şübhələrini gizlətmirlər.
Xəbərdə qeyd olunur ki, Ağ Ev Trampın 14-15 may tarixlərində planlaşdırılan China səfəri başa çatana qədər İran məsələsində diplomatik nəticə əldə olunmasını istəyir.
Mənbələrin iddiasına görə, əgər bu müddətdə razılaşma əldə olunmasa, Tramp administrasiyası İrana qarşı hərbi addımlar variantını da nəzərdən keçirə bilər.
Ağ Evdə jurnalistlərin suallarını cavablandıran Tramp İranla danışıqlarda müəyyən irəliləyişlərin olduğunu bildirib:
“Onlar bizimlə razılığa gəlmək istəyirlər. Son 24 saat ərzində çox məhsuldar müzakirələr apardıq və böyük ehtimalla razılıq əldə olunacaq”.
Tramp həmçinin Fox News telekanalının aparıcısı Bret Baier ilə telefon müsahibəsində İranla razılaşma üçün vaxt cədvəlinə toxunaraq, “hər şeyin tamamlanması üçün təxminən bir həftə vaxt lazım olduğunu” -deyib.
