Türkiyədə Fətullahçı Terror Təşkilatının (FETÖ) gizli strukturu ilə əlaqəli şəxslərin Maliyyə Cinayətlərinin Araşdırılması Şurasının (MASAK) rəqəmsal infrastrukturunun inkişafı və saxlanılmasına təsiri ilə bağlı aparılan “siyasi və hərbi casusluq” istintaqında 4 şübhəlinin həbsi tələb olunub.
Korrekt.az xəbər verir ki, İstanbul Baş Prokurorluğunun apardığı istintaq çərçivəsində FETÖ/PDY-nin gizli strukturu ilə əlaqəli şəxslərin və şirkətlərin 2012–2018-ci illərdə MASAK-ın kritik rəqəmsal infrastrukturunun yaradılması və saxlanılmasında rolunun olduğu barədə məlumatlar araşdırılır.
İstintaq çərçivəsində saxlanılan 6 şübhəlinin polis bölməsindəki prosedurları başa çatıb. Sağlamlıq yoxlamasından keçirilən şübhəlilər daha sonra İstanbulun Çağlayan rayonundakı Ədliyyə Sarayına aparılıblar.
Prokurorluqda ifadələri alınan Eda Aydoğan, Güner Eke, İnönü Akgün Alp və Zehra Yılmaz həbs tələbi ilə növbətçi magistrat məhkəməsinə göndəriliblər.
Zeki Özcan və Mehmet Yazıcı barədə isə məhkəmə nəzarəti tədbirinin tətbiqi tələb olunub.
Türkiyənin ədliyyə naziri Akın Gürlek daha əvvəl sosial şəbəkə hesabında istintaqla bağlı açıqlama verib.
Nazirin sözlərinə görə, araşdırma zamanı MASAK-ın rəqəmsal sistemlərində icazəsiz əməliyyatlar və sistem qeydlərinin təhlükəsizliyi ilə bağlı mühüm məlumatlar əldə edilib.
Gürlek bildirib ki, istintaq FETÖ/PDY-nin gizli strukturu ilə əlaqəli şəxslərin və şirkətlərin 2012–2018-ci illər ərzində MASAK-ın kritik rəqəmsal infrastrukturunun inkişafı və saxlanılmasında təsirli olduğunu ortaya qoyub.
Ədliyyə naziri istintaq çərçivəsində, həmin dövrdə MASAK-ın sədr müavini vəzifəsində çalışmış şəxs də daxil olmaqla, ümumilikdə 22 şübhəli barədə araşdırma aparıldığını açıqlayıb.
Onun sözlərinə görə, 5 şübhəli saxlanılıb, siyasi və hərbi casusluq ittihamları üzrə xaricdə olduğu müəyyən edilən 16 şübhəli barədə həbs qərarı çıxarılıb. Digər şübhəlinin tutulması istiqamətində tədbirlər davam etdirilir.
Gürlek həmçinin bildirib ki, istintaq çərçivəsində AGMLAB AŞ və MRD AŞ məhkəmə qərarı ilə müsadirə edilib və şirkətlərin idarə olunması üçün Türkiyənin Əmanətlərin Sığortalanması Fonduna (TMSF) qəyyum təyin olunub.
Nazirin sözlərinə görə, araşdırma çərçivəsində müvafiq dövrlərdə MASAK rəhbərliyində çalışmış üç keçmiş sədr də məhkəmə orqanları tərəfindən dindiriləcək.
İstintaq üzrə proses davam edir.
