Şimali Koreya uzun fasilədən sonra Çinlə sərnişin dəmir yolu əlaqəsini bərpa etməyə başlayıb. Korrekt.az xəbər verir ki, bu barədə The Independent nəşri məlumat yayıb.
Məlumata görə, Pekin və Pxenyan arasında altı ildən sonra ilk sərnişin qatarı üçün biletlər artıq satışa çıxarılıb. Pekindəki bilet kassası 12 mart tarixində planlaşdırılan reysin ərəfəsində satışın başladığını təsdiqləyib.
Qeyd olunur ki, dəmir yolu əlaqəsi 2020-ci ildə COVID-19 pandemiyasının başlanması ilə dayandırılmışdı. Marşrutun bərpası təcrid olunmuş ölkə ilə onun əsas iqtisadi tərəfdaşı olan Çin arasında mühüm nəqliyyat əlaqəsinin yenidən açılması deməkdir.
Bildirilir ki, hazırda qatarla səyahət yalnız iş vizası olan şəxslər üçün mümkündür. Pekindəki bilet kassasının məlumatına görə, sərnişinlər arasında əsasən iş adamları, dövlət məmurları və jurnalistlər yer alır.
18 mart tarixində planlaşdırılan növbəti reys üçün biletlərin isə hələ də satışda olduğu qeyd edilir.
Çin Dəmir Yollarının açıqlamasına əsasən, Pekin və Pxenyan arasında qatarlar həftədə dörd dəfə — bazar ertəsi, çərşənbə, cümə axşamı və şənbə günləri hərəkət edəcək. Bundan əlavə, Çinin sərhəd şəhəri Dandonq ilə Pxenyan arasında qatarlar hər gün işləyəcək.
Çin tərəfi bildirir ki, dəmir yolu əlaqəsinin bərpası iki ölkə arasında səyahət, ticarət və iqtisadi əməkdaşlığın genişlənməsinə, eləcə də insanlararası əlaqələrin inkişafına töhfə verəcək.
Buna baxmayaraq, Şimali Koreya hələ də əksər xarici turistlər üçün bağlı qalır. Səyahət agentliklərinin məlumatına görə, yalnız Rusiyadan olan müəyyən turist qruplarına ciddi məhdudiyyətlərlə ölkəyə səfər etməyə icazə verilir.
Pandemiyadan əvvəl isə Şimali Koreyaya gələn xarici turistlərin ən böyük hissəsini Çin vətəndaşları təşkil edirdi.
Tur operatorlarının məlumatına görə, Şimali Koreya gələn ay keçirilməsi planlaşdırılan Pxenyan marafonunu da ləğv edib. Bu tədbir əvvəllər xarici iştirakçılar üçün açıq olan azsaylı beynəlxalq tədbirlərdən biri sayılırdı.
Bununla yanaşı, iki ölkə arasında iqtisadi əlaqələr artmaqda davam edir. Məlumata görə, ötən il Çinin Şimali Koreyaya ixracı 2,3 milyard dollara çatıb. Bu göstərici son altı ilin ən yüksək səviyyəsi olmaqla yanaşı, əvvəlki illə müqayisədə 25 faiz artım deməkdir.
Şimali Koreya lideri Kim Çen In Çin prezidenti Si Cinpinə göndərdiyi mesajda bildirib ki, tərəflər “sosializmin ortaq işini” irəli apardıqca iki ölkə arasında əməkdaşlıq gələcəkdə daha da güclənəcək.
Xatırladaq ki, ötən il Rusiya Moskva–Pxenyan və Xabarovsk–Pxenyan marşrutlarında qatar hərəkətini bərpa edib. Moskva ilə Pxenyan arasında birbaşa dəmir yolu əlaqəsi 17 iyun 2025-ci ildə, Xabarovsk–Pxenyan marşrutu isə 19 iyunda yenidən istifadəyə verilib.
Moskva–Pxenyan marşrutu dünyanın ən uzun dayanacaqsız dəmir yolu xəttlərindən biri hesab olunur. İki paytaxt arasındakı məsafə 10 min kilometrdən çoxdur və səfər təxminən 8 gün davam edir.
