Korrekt.az xəbər verir ki, ABŞ Prezidenti Donald Tramp bildirib ki, İran nüvə proqramı ilə bağlı danışıqlarda daha yaxşı təklif təqdim etməsə, ABŞ tərəfindən daha sərt tədbirlərlə üzləşə bilər.
“Axios” nəşrinə telefon açıqlamasında Tramp qeyd edib ki, İran üçün “vaxt sürətlə daralır” və Tehran Vaşinqtonun tələblərinə yaxınlaşmasa, “daha ağır zərbə” alacaq.
ABŞ rəsmilərinin sözlərinə görə, Tramp administrasiyası müharibənin qarşısını alacaq razılaşmaya nail olmaq istəyir. Lakin İranın Vaşinqtonun bir sıra tələblərini qəbul etməməsi və nüvə proqramı ilə bağlı ciddi güzəştlərdən imtina etməsi hərbi variantın yenidən gündəmə gəlməsinə səbəb olub.
Məlumata görə, Trampın çərşənbə axşamı Ağ Evin Vəziyyət Otağında milli təhlükəsizlik komandası ilə görüş keçirərək mümkün hərbi variantları müzakirə etməsi gözlənilir.
ABŞ Prezidenti bazar günü İsrailin Baş naziri Benyamin Netanyahu ilə telefon danışığında İran ətrafındakı vəziyyəti müzakirə edib.
Mənbələrin məlumatına görə, Tramp şənbə günü Virciniyadakı qolf klubunda milli təhlükəsizlik komandasının üzvləri ilə də görüş keçirib. Görüşdə vitse-prezident Cey Di Vens, dövlət katibi Marko Rubio, Mərkəzi Kəşfiyyat İdarəsinin direktoru Con Retkliff və digər yüksəkvəzifəli şəxslər iştirak ediblər.
Bununla yanaşı, Pakistanın daxili işlər naziri Tehranla atəşkəs və mümkün razılaşma məsələlərini müzakirə etmək üçün İrana səfər edib. Pakistanın ABŞ və İran arasında vasitəçi rolunu oynadığı bildirilir.
Qətərin Baş naziri Məhəmməd bin Əbdürrəhman Əl-Tani də İran və Pakistan rəsmiləri ilə danışıqlar aparıb.
Tramp “Axios”a açıqlamasında hələ də İranın razılaşma əldə etmək istədiyinə inandığını bildirib. O qeyd edib ki, Vaşinqton bir neçə gün əvvəl təqdim olunan təklifdən daha yaxşı yeni İran təklifini gözləyir.
ABŞ Prezidenti deyib: “Biz razılığa gəlmək istəyirik. Amma onlar hələ bizim istədiyimiz nöqtədə deyillər. Ora çatmalıdırlar, əks halda ciddi nəticələrlə üzləşəcəklər”.
Tramp əlavə edib ki, İran vaxtında qərar verməsə, “əllərində heç nə qalmaya bilər”.
