İranın xarici işlər naziri Abbas Əraqçı ABŞ və İsrailin İrana qarşı hücumları ilə bağlı açıqlama verib.
Nazir bildirib ki, insanlar sadəcə ABŞ prezidenti Donald Trumpın “əylənmək istədiyi” üçün öldürülür. Onun sözlərinə görə, İran hücumlar davam etdiyi müddətdə özünü müdafiə etməyə davam edəcək.
Abbas Əraqçı müsahibəsində qeyd edib ki, İran indiyədək nə atəşkəs, nə də yeni danışıqlar tələb edib. O vurğulayıb ki, Tehran bu müharibəni “qanunsuz və sonu qələbə ilə bitməyəcək müharibə” hesab edir və Tramp bunu anlayana qədər ölkənin müdafiəsini davam etdirəcəklər.
Nazir ABŞ-ın hücumları zamanı Khark Island adasının ciddi zərər gördüyünü bildirib. Onun sözlərinə görə, hücum nəticəsində adanın böyük hissəsi dağıdılıb.
Abbas Əraqçı həmçinin ABŞ müdafiə naziri Pete Hegsethin İrana qarşı hücumlarda “mərhəmətə yer olmayacağı” ilə bağlı açıqlamasına da münasibət bildirib. O qeyd edib ki, bu müharibə ABŞ tərəfindən seçilib və İran özünümüdafiə hüququndan istifadə etməyə davam edəcək.
İranlı nazir ABŞ-la danışıqların bərpası üçün hazırda heç bir əsas görmədiklərini də vurğulayıb. Onun sözlərinə görə, Tehran Vaşinqtonla danışıqlar apardığı vaxt ABŞ-ın hücuma başlaması bu prosesə olan etimadı sarsıdıb.
Abbas Əraqçı ölkənin nüvə obyektlərinə edilən hücumlara da toxunaraq bildirib ki, obyektlər ciddi zərər görüb və bəzi materiallar dağıntılar altında qalıb. O qeyd edib ki, təxminən 440 kiloqram zənginləşdirilmiş nüvə materialının taleyi gələcəkdə müvafiq qurumların nəzarəti altında müəyyənləşdirilə bilər.
Nazir İranın region ölkələrində mülki obyektləri hədəf aldığı iddialarını da təkzib edib. Onun sözlərinə görə, İran yalnız ABŞ-a məxsus hərbi obyektləri və bazaları hədəf alır.
Abbas Əraqçı əlavə edib ki, bir sıra ölkələr gəmilərinin təhlükəsiz şəkildə Hörmüz boğazından keçməsi üçün İranla əlaqə saxlayıb və İran ordusu müəyyən gəmilərin keçidinə icazə verib.
O, həmçinin İranda saxlanılan ABŞ vətəndaşlarının təhlükəsizliyi ilə bağlı suala cavab verərək bildirib ki, ABŞ və İsrail İran həbsxanalarına hücum etmədiyi müddətdə onların təhlükəsiz qalacağı ehtimal olunur.
Nazir ölkədə internetə tətbiq edilən məhdudiyyətlərin təhlükəsizlik səbəbləri ilə bağlı olduğunu deyib. Onun sözlərinə görə, müharibə şəraitində hər bir dövlət əhalinin təhlükəsizliyini təmin etmək üçün fövqəladə tədbirlər görür.
Qeyd edək ki, ABŞ və İsrail fevralın 28-də Tehran və Vaşinqton arasında danışıqlar davam etdiyi vaxt İrana hərbi hücumlara başlayıb. İran isə cavab olaraq regionda ABŞ hərbi mövcudluğu olan bəzi ölkələrdəki hədəflərə zərbələr endirib.
İran rəsmilərinin məlumatına görə, hücumlar nəticəsində ölkədə ölənlərin sayı 1348 nəfərə, yaralananların sayı isə 17 mindən çoxdur.
