ABŞ Prezidenti Donald Tramp İranla bağlı sərt bəyanatla çıxış edib. Korrekt.az xəbər verir ki, o, Tehranın Vaşinqtonun irəli sürdüyü şərtlərlə razılaşmaması halında hərbi əməliyyatların davam etdiriləcəyini bildirib.
Trampın sözlərinə görə, hazırda həyata keçirilən bombardman əməliyyatları yaxın vaxtlarda başa çata bilər. Lakin İran tərəfi mümkün razılaşma memorandumunu imzalamasa, ABŞ yeni hərbi zərbələr endirəcək.
“Bombardman tezliklə başa çatacaq. Əgər iranlılar anlaşma memorandumunu imzalamasalar, sabah onları yenidən bombalayacağıq”, – deyə ABŞ prezidenti vurğulayıb.
Trampın açıqlaması ABŞ və İran arasında gərginliyin artdığı bir vaxta təsadüf edir. Son günlər hər iki tərəf arasında qarşılıqlı ittihamlar səsləndirilib, bölgədə hərbi aktivlik isə nəzərəçarpacaq dərəcədə yüksəlib.
Analitiklər hesab edirlər ki, Vaşinqton və Tehran arasında diplomatik razılaşmanın əldə olunmaması Yaxın Şərqdə təhlükəsizlik vəziyyətinin daha da mürəkkəbləşməsinə səbəb ola bilər.
