Ağ Ev ABŞ-ın 250 illik yubileyinə həsr olunmuş yeni təşəbbüs çərçivəsində üzərində Prezident Donald Tramp portreti olan məhdud sayda pasportların buraxılacağını təsdiqləyib.
Korrekt.az xəbər verir ki, iyul ayında start götürəcək layihə ölkədə milli simvolların və bəzi federal atributların yenidən dizayn olunması prosesinin bir hissəsi kimi qiymətləndirilir. Layihə ABŞ Müstəqillik Bəyannaməsi sənədinin 250 illiyi münasibətilə həyata keçirilir.
Yeni dizayn ABŞ Dövlət Departamenti tərəfindən təqdim olunub. Pasportun daxili üz qabığında Müstəqillik Bəyannaməsinin mətni, ABŞ bayrağı və Donald Trampın portreti yer alacaq. Portretin altında isə qızılı rəngdə prezidentin imzası yerləşdiriləcək.
Ağ Evin sözçüsü bildirib ki, bu addım vətəndaşlara ölkənin yubileyini “vətənpərvər şəkildə qeyd etmək imkanı” yaratmaq məqsədi daşıyır. Qeyd olunur ki, standart pasport dizaynı bütün vətəndaşlar üçün əlçatan olacaq, lakin xüsusi buraxılış yalnız Vaşinqton Pasport İdarəsində təqdim ediləcək.
Hazırda istifadə olunan ABŞ pasportlarında Ay səfəri kimi tarixi hadisələr və Azadlıq Heykəli kimi milli simvollar əks olunub. Yeni pasportların 10 il müddətində etibarlı olacağı və Trampın prezidentlik müddəti başa çatdıqdan sonra da istifadə ediləcəyi bildirilir.
Yeni pasport təşəbbüsü hazırkı administrasiyanın dövlət institutlarında və ictimai məkanlarda Trampın adının və imicinin geniş tətbiqi istiqamətində atdığı addımların davamı kimi qiymətləndirilir.
Belə ki:
ABŞ Zərbxanası üzərində Trampın təsviri olan 24 karatlıq qızıl xatirə sikkələrinin hazırlanmasını planlaşdırır
Trampın ABŞ əskinaslarında imzası olan ilk prezident olacağı iddia edilir
Con Kennedi adına İfa Sənətləri Mərkəzi qəyyumlar şurasının qərarı ilə “Tramp-Kennedi Mərkəzi” adlandırılıb
Bu dəyişikliklər xüsusilə Con F. Kennedi ailəsi tərəfindən tənqid olunub.
Bundan əlavə, Vaşinqtonda “Trampın Arkası” adlandırılan, təxminən 76 metr hündürlüyündə zəfər tağının tikintisi üçün ilkin razılıq verildiyi bildirilir. Layihə ictimaiyyət və tarixi irsin qorunması ilə məşğul olan qruplar tərəfindən etirazla qarşılanıb.
Digər mübahisəli addımlardan biri isə Ağ Evin Şərq Qanadının sökülməsi və prezident iqamətgahının ərazisində yeni bal zalının tikintisi planıdır. Milli Tarixi Qoruma Fondu bu layihə ilə bağlı administrasiyaya qarşı məhkəmə iddiası qaldıraraq, tikintinin Konqresin razılığı olmadan başladığını iddia edir.
Yeni təşəbbüslər ABŞ-da ictimai və siyasi müzakirələrin daha da intensivləşəcəyini göstərir.
