Bakı Moskva ilə müttəfiqlik əməkdaşlıq münasibətlərini inkişaf etdirməyə davam etməyə hazırdır, lakin Rusiya mediasında Azərbaycanla bağlı mənfi informasiya fonu buna mane olur. Korrekt.az xəbər verir ki, bu barədə Azərbaycanın Rusiyadakı səfiri Rəhman Mustafayev RTVI– yə bildirib .
O qeyd edib ki, müttəfiq əməkdaşlığının inkişafı və münasibətlərimizin əsasını təşkil edən 22 fevral 2022-ci il tarixli Bəyannamənin müddəalarının həyata keçirilməsi, bəzi rusiyalı ekspertlər, bloqçular və jurnalistlər tərəfindən sosial şəbəkələrdə və mediada məqsədyönlü şəkildə yaradılan Azərbaycana qarşı son dərəcə mənfi informasiya fonu şəraitində çətinləşir.
Rəhman Mustafayev əlavə edib ki, “bu gün ən azı 96 Rusiya xəbər portalı, Telegram və YouTube kanalları, eləcə də milyonlarla dollarlıq auditoriyası olan digər media orqanları vaxtaşırı olaraq Azərbaycanı Rusiya üçün “dost olmayan” dövlət kimi təqdim edir və bu rəqəm hər gün artır”.
“Rusiya nümayəndələri ilə müxtəlif siyasi səviyyələrdə dəfələrlə görüşlər zamanı son zamanlar Rusiya mediasında və informasiya məkanında Azərbaycana, onun xalqına və rəhbərliyinə qarşı edilən təhqiramiz ifadələrlə bağlı ciddi narahatlığımızı onlara çatdırdıq. Lakin bu cür fəaliyyətin qarşısını almaq üçün dəfələrlə çağırışlarımıza baxmayaraq, bu, nəinki davam etdi, hətta daha da təhdidedici formalar aldı ”, – deyə Mustafayev vurğulayıb.
