İsraildə müxalifət düşərgəsində yeni siyasi birlik formalaşır. Keçmiş baş nazir Naftali Bennett və müxalifət lideri Yair Lapid qarşıdakı seçkilərdə vahid siyahı ilə iştirak etməyi planlaşdırır. Korrekt.az yerli mediaya istinadən xəbər verir ki, bu addım onların hazırkı baş nazir Benjamin Netanyahu rəhbərliyindəki hökuməti hakimiyyətdən uzaqlaşdırmaq şansını artıra bilər.
Yeni yaradılması nəzərdə tutulan “Birlikdə” blokunun əsas məqsədi daxili parçalanmaya son qoymaq və oktyabrın 27-nə planlaşdırılan parlament seçkilərində qələbə qazanmaqdır. Sorğulara əsasən, Bennettin liderlik etdiyi siyasi qüvvə Knessetdə təxminən 24 mandat qazana bilər ki, bu da Netanyahunun rəhbərlik etdiyi Likud partiyası ilə eyni səviyyə deməkdir. Lapidin rəhbərlik etdiyi “Gələcək Var” partiyasının isə parlamentdə daha məhdud təmsil olunacağı proqnozlaşdırılır.
Analitiklər hesab edir ki, bu ittifaq 120 yerlik parlamentdə hökumət qurmaq üçün tələb olunan 61 mandatlıq həddi keçmək baxımından müxalifətə real imkan yarada bilər. Bununla belə, əsas çətinliklərdən biri Bennettin sağçı elektoratını daha dünyəvi mövqeyi ilə tanınan Lapidlə əməkdaşlığa inandırmaqdır.
Hakim düşərgə isə bu birləşməyə sərt reaksiya verib. Likud partiyası ittifaqı “sağçı səsləri parçalamağa yönəlmiş siyasi manevr” kimi qiymətləndirib. Milli Təhlükəsizlik naziri Itamar Ben-Gvir və maliyyə naziri Bezalel Smotrich də ittifaqı tənqid edərək onun uzunömürlü olmayacağını iddia ediblər. Şas partiyasının lideri Aryeh Deri isə bu əməkdaşlığı “nifrət ittifaqı” adlandırıb.
Digər tərəfdən, müxalifət daxilində bu addıma dəstək verənlər də var. Keçmiş müdafiə naziri Avigdor Lieberman birləşməni alqışladığını bildirib və əsas məqsədin hazırkı hökuməti dəyişmək olduğunu vurğulayıb. Keçmiş hərbi rəhbər Gadi Eisenkot da bu qərarı müsbət qiymətləndirərək “milli məsuliyyətli koalisiyanın qurulması” çağırışı edib.
Xatırladaq ki, Bennett və Lapid daha əvvəl 2021-ci ildə birgə koalisiya quraraq Netanyahunun uzunmüddətli hakimiyyətinə son qoymuşdular. Yeni ittifaqın seçkilərdə necə nəticə verəcəyi isə İsrail siyasətində növbəti güc balansını müəyyənləşdirəcək əsas amillərdən biri olacaq.
