2026-cı ilin yanvar ayında rus turistlərin ən çox üstünlük verdiyi xarici turizm istiqamətləri müəyyənləşib.
Korrekt.az xəbər verir ki, Rusiya Tur Operatorları Assosiasiyasının (ATOR) Analitik Xidməti turizm rezervasiya platforması Sletat.ru-nun 2026-cı ilin yanvar ayına aid axtarış və satış göstəricilərini təhlil edib. Təhlil nəticələri rus turistlərin xarici səfər seçimlərinin ötən illə müqayisədə daha balanslı və coğrafi baxımdan daha geniş yayıldığını göstərib.
Məlumata görə, 10 ölkə aparıcı tur operatorları tərəfindən həyata keçirilən bütün paket tur satışlarının 93,5 faizini təşkil edib. Ötən ilin eyni dövründə bu göstərici 96,6 faiz idi. Payın azalması rus turistlərin səyahət marşrutlarının daha geniş coğrafiyanı əhatə etdiyini göstərir.
Misir və Tailand ötən il olduğu kimi siyahının ilk iki pilləsində qalsa da, bu ölkələrin bazar payında azalma qeydə alınıb. 2025-ci ilin yanvarında hər iki ölkə birlikdə ümumi satışların təxminən 55 faizini təşkil edirdisə, 2026-cı ilin yanvarında bu göstərici 47 faizə enib.
Çarter reyslərin bərpası Vyetnamın mövqelərini xeyli gücləndirib. Ötən il 1,7 faiz payla 10-cu yerdə olan Vyetnam bu il 12,2 faiz göstərici ilə dördüncü pilləyə yüksəlib və ən diqqətçəkən artımı nümayiş etdirib.
Bunun əksinə olaraq, Rusiyadaxili turlara tələbat əhəmiyyətli dərəcədə azalıb. 2025-ci ilin yanvarında üçüncü sırada qərarlaşan Rusiya bu il siyahıda beşinci yerə geriləyib.
Türkiyə isə ötən il olduğu kimi bu il də altıncı sırada qalıb. Türkiyənin paket tur satışlarındakı payı 4,1 faiz olub ki, bu da ötən ildəki 4,3 faizlik göstəricidən bir qədər aşağıdır.
Çin bazar payını 2,2 faizdən 2,9 faizə yüksəldərək Şri Lankanı geridə qoyub.
Maldiv adaları 2025-ci ildə rus turistlərin sayına görə rekord göstərici qeydə alındıqdan sonra ilk dəfə yanvar ayı üzrə ən çox satılan 10 istiqamət sırasına daxil olub. Ötən il siyahıda yer alan Hindistan isə bu dəfə ilk onluğa düşməyib.
Sletat.ru platformasında aparılan axtarış məlumatları satış nəticələri ilə böyük ölçüdə üst-üstə düşsə də, bəzi fərqlər də müşahidə olunub. Axtarışlarda Misir 27,1 faizlə birinci yeri tutub. Onu Birləşmiş Ərəb Əmirlikləri (16,2 faiz) və Tailand (15,6 faiz) izləyib.
Axtarış marağı baxımından Vyetnam (8,6 faiz) və Türkiyə (6,9 faiz), Rusiyanı (5 faiz) geridə qoyub. Maldiv adaları isə 3,5 faiz payla axtarışlarda yeddinci sıraya yüksəlib.
Təhlilə görə, rus turistlər yanvar ayı üçün Vyetnam, Çin, Maldiv adaları və Türkiyəyə maraqlarını artırıblar. Eyni zamanda Şri Lanka, Kuba, Misir və Tailand istiqamətlərinə olan axtarışlarda azalma qeydə alınıb.
Həm satış, həm də axtarış göstəriciləri rus turistlərin səyahət seçimlərində coğrafi müxtəlifliyin nəzərəçarpacaq dərəcədə artdığını göstərir.
