Ukrayna hava məkanının mühafizəsini gücləndirmək məqsədilə innovativ hərbi texnologiyaların tətbiqinə başlayıb. Ölkədə yeni nəsil lazer hava hücumundan müdafiə (HHM) sistemlərinin sınaqları həyata keçirilir.
Korrekt.az xəbər verir ki, bu barədə Ukraynanın rəqəmsal transformasiya və müdafiə naziri Mixaylo Fedorov “Brave1 Advantage” tədbiri zamanı bəyan edib.
Nazir bildirib ki, lazer sistemlərinin ilk sınaq nəticələri artıq əldə olunub və hazırda yerli mütəxəssislər tərəfindən təhlil edilir:
“Biz artıq lazeri sınaqdan keçiririk və müəyyən nəticələr var. Hələlik geniş təfərrüatları açıqlamırıq, lakin bu istiqamət aktiv şəkildə inkişaf etdirilir.”
M. Fedorov rəqib PUA-larına qarşı mübarizənin statistikasına da toxunub. Onun sözlərinə görə, təkcə may ayında Ukrayna ordusu Rusiyaya məxsus “Shahed” və “Gerbera” tipli təxminən 7 min pilotsuz təyyarəni zərərsizləşdirib. Son kütləvi hücumların biri zamanı isə düşmən dronlarının 75%-i məhz Ukraynanın xüsusi tutucu (interseptor) dronları vasitəsilə məhv edilib.
Nazir qeyd edib ki, hazırda Ukrayna düşmən dronlarını vurmaq üçün ucuz raketlər istehsal edən 10 fərqli şirkətin layihələrini sınaqdan keçirir. Bununla yanaşı, süni intellekt (AI) texnologiyaları ilə təchiz olunmuş büdcəli qanadlı raketlərin hazırlanması da əsas prioritetlərdən biridir. Bu raketlərin bir il ərzində silahlanmaya daxil edilməsi planlaşdırılır.
Hava hücumundan müdafiə sahəsində xərcləri minimuma endirmək istəyən Ukrayna, qərb tərəfdaşları ilə birgə yeni layihələr üzərində işləyir. “Defense News” nəşrinin yaydığı məlumata görə, Ukraynanın “Fire Point” şirkəti ilə Almaniyanın hərbi-sənaye nəhəngi “Hensoldt” arasında imzalanmış memoranduma əsasən, “Freyja” adlı yeni HHM sistemi hazırlanır.
Analitiklər və tərtibatçılar bu sistemin iqtisadi səmərəliliyini xüsusi vurğulayırlar:
“Freyja” sisteminin əsas elementi olan FP-7 interseptor raketinin bir atışının qiyməti təxminən 700 min dollar təşkil edəcək.
Bu, ABŞ-ın məşhur “Patriot PAC-3” raketləri ilə müqayisədə (hansı ki, bir ədədinin qiyməti 5 milyon dollardan baha başa gəlir) təxminən 7 dəfə ucuzdur.
Hazırda ballistik raketlərə və idarə olunan aviasiya bombalarına (KAB) qarşı daha effektiv və az xərclə başa gələn müdafiə sistemlərinin qurulması istiqamətində işlər sürətlə davam etdirilir.
