Xəzər Boru Kəməri Konsorsiumu (XBKK) yükdaşıyanlardan neft qəbulunu və Novorossiysk limanındakı dəniz terminalından onun yüklənməsini bərpa edib.
Bu barədə Qazaxıstan Respublikası Enerji Nazirliyi xəbər verir.
Hazırda “Seamajesty” və “Milos” tankerləri Konsorsiumun lövbər məntəqəsində xam neft yükləyir. Hər iki gəmi “Tengizchevroil LLP” şirkətindən neft qəbul edir.
Neft qəbulunun bərpası şirkətlərə boru kəməri sisteminə tədarükləri davam etdirməyə və dəniz terminalı vasitəsilə ixrac əməliyyatlarını bərpa etməyə imkan verir. Terminalda sonrakı əməliyyatlar mövcud vəziyyətin və zəruri təhlükəsizlik tələblərinin qiymətləndirilməsindən asılıdır. XBKK rəhbərliyi əsas yükdaşıyanlar və digər maraqlı tərəflərlə daim əlaqə saxlayıb, vəziyyətin nəzarətdə olduğunu və Qazaxıstan neftinin davamlı nəqlini təmin etmək üçün tədbirlərin koordinasiya edildiyini bildirib.
Daha əvvəl bildirilmişdi ki, Xəzər Boru Kəməri Konsorsiumu neft tankerlərinə edilən hücumlar səbəbindən Qara dəniz terminalında daşınmaları dayandırdıqdan sonra Qazaxıstandan neft qəbulunu dayandırıb.
