Rusiyada vətəndaşların daxili pasportlarının vaxtında dəyişdirilməsi ilə bağlı qaydalar yenidən gündəmə gəlib. Sənədin vaxtında yenilənməməsi onun etibarsız sayılmasına və bir sıra hüquqi və maliyyə problemlərinə səbəb ola bilər.
Korrekt.az xəbər verir ki, mövcud qaydalara əsasən, Rusiya vətəndaşları ilk pasportlarını 14 yaşında alırlar. Sənəd daha sonra 20 və 45 yaşlarında dəyişdirilməlidir. 45 yaşdan sonra verilən pasport isə müddətsiz hesab olunur.
Pasportun dəyişdirilməsi üçün müəyyən edilmiş müddətə əməl etmək vacibdir. Mənbənin məlumatına görə, 20 və ya 45 yaş tamam olduqdan sonra sənədin dəyişdirilməsi üçün 30 gün vaxt verilir. Müddətin ötürülməsi inzibati məsuliyyət və cərimə ilə nəticələnə bilər.
Pasport başqa hansı hallarda dəyişdirilməlidir?
Pasport yalnız yaş həddinə çatdıqda deyil, digər hallarda da yenilənməlidir. Bunlara şəxsi məlumatların, o cümlədən soyadın dəyişdirilməsi, sənədin itirilməsi və ya zədələnməsi daxildir.
Pasport aşağıdakı hallarda etibarsız hesab oluna bilər:
sənədin dəyişdirilməsi üçün müəyyən edilmiş müddətin başa çatması;
şəxsi məlumatların dəyişməsi;
pasportun ciddi şəkildə zədələnməsi;
səhifələrin və ya üzərindəki məlumatların zədələnməsi;
sənəddə kənar qeydlərin olması.
Sənədin itirilməsi və ya qəsdən zədələnməsi hallarında vətəndaş cərimələnə bilər.
Pasportda Daxili İşlər Nazirliyinin əməkdaşının imzasının olmaması hər zaman sənədin etibarsız olduğu anlamına gəlmir. Sənəddə onu verən orqanın adı, bölmənin kodu, verilmə tarixi və müvafiq möhür kimi əsas rekvizitlərin olması tələb olunur.
Bununla yanaşı, vətəndaşın pasportda onun üçün nəzərdə tutulmuş sahəni imzalaması vacibdir. İmzanın olmaması sənədin etibarsız hesab edilməsinə səbəb ola bilər.
Rusiyada pasportların verilməsi və dəyişdirilməsi 2016-cı ildən etibarən Daxili İşlər Nazirliyinin səlahiyyətindədir. Bundan əvvəl bu funksiyanı Federal Miqrasiya Xidməti həyata keçirirdi.
Mütəxəssislər vətəndaşlara pasport məlumatlarını mütəmadi yoxlamağı və sənədin dəyişdirilməsi üçün müəyyən edilmiş müddətləri nəzərdən qaçırmamağı tövsiyə edirlər. Etibarsız pasport bank xidmətlərindən istifadə, kredit müraciətləri və digər rəsmi prosedurlar zamanı problemlər yarada bilər.
