Dünyada dini demoqrafiya ilə bağlı aparılan yeni araşdırmalar İslamın qarşıdakı onilliklərdə ən sürətlə böyüyən din olacağını göstərir. Mütəxəssislərin proqnozlarına görə, yüksək doğum göstəriciləri və gənc əhali sayəsində müsəlman əhalinin sayı 2050-ci ilə qədər təxminən 41 faiz artacaq.
Korrekt.az xəbər verir ki, hazırda xristianlıq dünya əhalisinin təxminən 31 faizini təşkil etməklə ən böyük dini qrup olaraq qalır. Lakin İslamın payı sürətlə artır. Demoqrafik modellərə əsasən, 2050-ci illərdə müsəlmanların dünya əhalisindəki payı 30 faizə yaxınlaşacaq və xristianlarla aradakı fərq əhəmiyyətli dərəcədə azalacaq.
Araşdırmada qeyd olunur ki, bu artımın əsas səbəbləri müsəlman əhalinin orta yaş həddinin daha aşağı olması və doğum səviyyəsinin qlobal orta göstəricidən yüksək qalmasıdır. Xristian icmalarında isə bəzi bölgələrdə sekulyarlaşma və yaşlanan əhali artım tempini zəiflədir.
Məlumata görə, dini mənsubiyyəti olmayan insanların payının da artmasına baxmayaraq, aşağı doğum göstəriciləri səbəbindən onların dünya əhalisindəki ümumi nisbətinin uzunmüddətli perspektivdə azalacağı gözlənilir. Buddizmin isə aşağı doğum səviyyələri və yaşlanan əhali səbəbindən demək olar ki, artım göstərməyəcəyi proqnozlaşdırılır.
Araşdırma həmçinin göstərir ki, Avropada müsəlman əhalinin payı artmağa davam edəcək, ABŞ-da isə müsəlmanlar say baxımından ölkənin ən böyük dini azlıq qruplarından birinə çevrilə bilərlər. Hindistanın isə gələcəkdə dünyanın ən böyük müsəlman əhalisinə malik ölkəsi olacağı proqnozlaşdırılır.
Mütəxəssislər vurğulayırlar ki, bu rəqəmlər demoqrafik proqnozlara əsaslanır və gələcəkdə miqrasiya, doğum səviyyələri, sosial dəyişikliklər və fərdi seçimlər kimi amillər nəticələrə təsir göstərə bilər.Musavat.com
