10 yaşında kollecə başlayan amerikalı Nathan Tomas rəsmi olaraq tarixin ən gənc kollec professoru kimi tanınıb. Ginnesin Rekordlar Kitabına görə, o, kollecdə 18 il 346 günlüyündə dərs deməyə başlayıb.
Korrekt.az xəbər verir ki, 2023-cü ilin avqust ayında Tomas Florida ştatındakı Mayami-Dade Kollecində onlayn kurslar tədris etmək üçün işə başladı. O vaxt onun hələ 19 yaşı yox idi ki, bu da ona yeni dünya rekordu qoymağa imkan verdi.
Əvvəlki kişi rekordu 300 ildən çox əvvəl, 19 yaşında professor olan şotland riyaziyyatçısı Kolin Maklorinə məxsus idi.
Tomas həmçinin 2008-ci ildə ən gənc qadın professor olan amerikalı Alia Saburdan 16 gün kiçik idi.
Tomas akademik karyerasına qeyri-adi dərəcədə erkən başladı: 10 yaşında eyni vaxtda Mayami-Dade Kollecinə daxil oldu və 14 yaşında Florida Beynəlxalq Universitetinə keçdi. 18 yaşında elektrik mühəndisliyi üzrə magistr dərəcəsi almışdı.
Tomas hazırda Mayami Universitetinin Hüquq Məktəbində təhsili ilə yanaşı, müəllimlik fəaliyyətini də birləşdirir. O, hüquq doktoru dərəcəsi almaq üçün təhsilini davam etdirir və elm və texnologiya ilə əlaqəli əqli mülkiyyət hüququ üzrə ixtisaslaşmağı planlaşdırır.
Tomasın sözlərinə görə, mühəndislik təhsili ona mürəkkəb problemləri sistemli şəkildə təhlil etməyi öyrədib və bu yanaşma indi ona hüquq təhsilində də kömək edir.
