İstanbul Hava Limanı gündəlik sərnişin sayına görə həm Türkiyə, həm də Avropada bütün zamanların rekordunu yeniləyib. Avqustun 1-də hava limanı 289 min 260 sərnişinə xidmət göstərərək yeni tarixi göstəriciyə imza atıb.
Korrekt.az xəbər verir ki, Türkiyənin nəqliyyat və infrastruktur naziri Əbdülqadir Uraloğlu bildirib ki, İstanbul Hava Limanı bir gündə qəbul etdiyi sərnişinlərin sayına görə indiyədək həm Türkiyə, həm də Avropada qeydə alınmış ən yüksək nəticəni əldə edib.
Nazirin sözlərinə görə, 289 min 260 sərnişinə xidmət göstərilməsi İstanbul Hava Limanının beynəlxalq aviasiyada artan rolunun və güclü potensialının göstəricisidir.
Uraloğlu qeyd edib ki, müasir infrastrukturu, yüksək xidmət keyfiyyəti və böyük sərnişin tutumu sayəsində İstanbul Hava Limanı dünyanın aparıcı hava nəqliyyatı qovşaqlarından birinə çevrilib.
O vurğulayıb ki, yeni rekord hava limanının qlobal tranzit və transfer mərkəzi kimi mövqeyini daha da möhkəmləndirir və Türkiyənin beynəlxalq aviasiyadakı strateji əhəmiyyətini artırır.
Mütəxəssislərin fikrincə, İstanbul Hava Limanında sərnişin axınının davamlı artması Türkiyənin turizm sektorunun inkişafı, beynəlxalq uçuş şəbəkəsinin genişlənməsi və ölkənin qlobal hava nəqliyyatı bazarındakı payının yüksəlməsi ilə birbaşa bağlıdır.
