” Rusiya siyasi elitasında Azərbaycanla bağlı müəyyən narahatlıq hiss olunur. Azərbaycanın Qərb ölkələri ilə fəal əməkdaşlığı bəzi dairələr tərəfindən Moskvanın regiondakı təsir imkanlarının zəifləməsi kimi şərh edilir. Bunun nəticəsi olaraq informasiya məkanında Azərbaycana qarşı daha sərt və tənqidi ritorika diqqət çəkir.”– bu fikirləri politoloq Arzuman Muradlı bildirib.
Politoloq qeyd edib ki, son dövrlərdə Rusiya mediasında və müxtəlif platformalarda Azərbaycana və onun rəhbərliyinə qarşı tənqidi materialların sayının artması, eləcə də diaspor müstəvisində müəyyən təzyiq elementlərinin hiss olunması informasiya müharibəsinin tərkib hissəsi kimi qiymətləndirilə bilər.
“Bu proses açıq hərbi qarşıdurma xarakteri daşımır, lakin informasiya və siyasi təsir mexanizmləri üzərindən aparılan rəqabət kimi özünü göstərir. Bu tendensiya yalnız Azərbaycana münasibətdə müşahidə edilmir. Postsovet məkanında, o cümlədən Qazaxıstan, Özbəkistan və Tacikistan kimi ölkələrlə münasibətlərdə də oxşar yanaşmalar mövcuddur. Bu isə məsələnin təkcə ikitərəfli münasibətlərlə məhdudlaşmadığını, daha çox Rusiyanın mövcud siyasi elitasının geosiyasi baxışları ilə əlaqəli olduğunu göstərir. Həmin baxışa əsasən, regionda əsas güc mərkəzi Moskva olmalı, digər ölkələrin isə müstəqil və çoxşaxəli siyasət yürütməsi müəyyən narahatlıq doğurur. Hazırkı mərhələdə Rusiyanın genişmiqyaslı hərbi addımlar atmaq imkanları məhdud qiymətləndirilir. Bununla belə, informasiya və siyasi təsir alətlərindən aktiv şəkildə istifadə olunduğu müşahidə edilir. Azərbaycan isə balanslı və praqmatik xarici siyasət kursunu davam etdirir. Rəsmi Bakı qarşıdurma tərəfdarı olmadığını nümayiş etdirir, eyni zamanda suverenlik və milli maraqlar məsələsində prinsipial mövqe sərgiləyir. Münasibətlərin normallaşması üçün hər iki tərəfin siyasi iradə ortaya qoyması vacib amil kimi çıxış edir.”- deyə Arzuman Muradlı bildirib.
Politoloq bildirib ki, digər mühüm məsələ Rusiya–Ukrayna müharibəsi ilə bağlı danışıqların nəticəsiz qalmasıdır.
“Hazırda müharibə tükəndirmə mərhələsində davam edir. Həm Ukrayna, həm də Rusiya rəhbərliyi dörd ilə yaxın davam edən müharibənin nəticələrini daxili auditoriyaya müəyyən mənada “qələbə” kimi təqdim etməyə çalışır. Lakin böyük insan və iqtisadi itkilər fonunda aydın və birmənalı qələbə modelinin formalaşmadığı görünür. Rusiyada müharibənin açıq və qəfil məğlubiyyətlə başa çatması siyasi elita üçün ciddi daxili risklər yarada bilər. Eyni zamanda, Ukraynada da əldə olunan nəticələrin cəmiyyətə necə təqdim ediləcəyi mühüm siyasi məsələ olaraq qalır. Bu amillər tərəflərin kompromisə getməsini çətinləşdirir. Yaxın perspektivdə genişmiqyaslı və dayanıqlı sülh razılaşmasının əldə olunması ehtimalı zəif qiymətləndirilir. Daha real ssenari müharibənin aşağı intensivliklə davam etməsi, lokal hərbi əməliyyatlar və mövqe dəyişiklikləri ilə müşayiət olunan uzanan qarşıdurmadır. Tərəflər qarşı tərəfi hərbi, iqtisadi və siyasi baxımdan tükəndirməyə çalışırlar. Münaqişənin davametmə müddəti isə həm cəbhədəki vəziyyətdən, həm də beynəlxalq dəstəyin dinamikasından asılı olacaq. Mövcud şəraitdə qısa müddətdə tam və davamlı sülh perspektivi zəif görünür.” – deyə Arzuman Muradlı bildirib.
