Britaniya Rusiya ilə yüksək səviyyəli hərbi dialoqu bərpa etməyə çalışır. Məqsəd dənizdə baş verə biləcək insidentlərin daha geniş və birbaşa hərbi qarşıdurmaya çevrilməsinin qarşısını almaqdır.
“Times” qəzetinin yazdığına görə, ekspertlər və diplomatlar Britaniya ilə Rusiya arasında dənizdə baş verən lokal hadisələrin yanlış anlaşılma və ya eskalasiya nəticəsində daha böyük hərbi münaqişəyə səbəb ola biləcəyi barədə xəbərdarlıq edirlər.
Korrekt.az xəbər verir ki, Britaniya hökumətindəki mənbələr bildiriblər ki, London Moskva ilə dialoqun bərpasında maraqlıdır. Lakin Rusiya tərəfinin britaniyalı həmkarların əlaqə cəhdlərinə cavab verməməsi təşəbbüsün nəticəsiz qalmasına səbəb olub.
Məlumata görə, Britaniya və Rusiya hərbi rəhbərliyi arasında birbaşa əlaqələr təxminən dörd ildir ki, yoxdur. Bu vəziyyət xüsusilə açıq dənizlərdə hərbi gəmilər arasında baş verə biləcək insidentlərlə bağlı narahatlıqları artırır.
Britaniya müdafiə rəhbərləri və hökumət rəsmiləri gözlənilməz eskalasiyanın qarşısını almaq üçün Moskva ilə yüksək səviyyəli kommunikasiya kanallarının bərpasına ehtiyac olduğunu düşünürlər.
Britaniya Müdafiə Qərargahının rəhbəri vəzifəsini icra etməyə başladıqdan sonra Riçard Naytonun Rusiya Silahlı Qüvvələrinin Baş Qərargah rəisi, general Valeri Gerasimovla əlaqə yaratmağa çalışdığı bildirilir. Lakin onun zənglərinin cavabsız qaldığı qeyd olunur.
Diplomatlar hesab edirlər ki, London-Moskva arasında birbaşa kommunikasiya kanallarının olmaması dənizdə və digər potensial qarşıdurma nöqtələrində yaranan anlaşılmazlıqların nəzarətdən çıxması riskini artırır.
Beləliklə, Britaniya tərəfi Rusiya ilə siyasi fikir ayrılıqları davam etsə də, hərbi insidentlərin daha geniş qarşıdurmaya çevrilməsinin qarşısını almaq üçün dialoq mexanizmlərinin saxlanılmasını vacib hesab edir.
