Ukraynanın pilotsuz uçuş aparatları istehsalçısı SkyFall Rusiyanın istifadə etdiyi “Shahed” tipli kamikadze dronlarına qarşı mübarizə məqsədilə hazırladığı yeni yüksək sürətli tutucu dronu P1-SUN Jetkiller modelini təqdim edib.
Korrekt.az xəbər verir ki, yeni model Ukraynanın ötən ilin sonlarından istifadə etdiyi P1-SUN tutucu dronunun daha sürətli versiyasıdır. Şirkət bildirir ki, P1-SUN Jetkiller saatda 370 kilometr sürət yığa bilir. Müqayisə üçün qeyd edək ki, əvvəlki P1-SUN modeli maksimum 310 km/saat sürətlə uçurdu.
Son aylarda Rusiyanın bəzi “Shahed” (Rusiyada “Geran” adı ilə tanınır) dronlarını reaktiv mühərriklərlə təchiz etməsi onların sürətini 500 km/saata qədər artırıb. Bu isə hava hücumundan müdafiə qüvvələrinin hədəfi aşkar edib zərərsizləşdirməsi üçün mövcud vaxtı əhəmiyyətli dərəcədə azaldır.
Reuters-in məlumatına əsasən, Ukrayna Hərbi Hava Qüvvələrinin yüksək rütbəli komandiri Yuri Çerevaşenkonun sözlərinə görə, hazırda Rusiyanın Ukraynaya qarşı istifadə etdiyi “Shahed” dronlarının təxminən 15–20 faizi artıq reaktiv mühərriklə təchiz olunub.
SkyFall nümayəndəsinin sözlərinə görə, Jetkiller layihəsi üzərində işlər təxminən üç ay əvvəl başlayıb. Yeni dron artıq döyüş şəraitində sınaqdan keçirilib və ilkin məlumatlara əsasən, onun vasitəsilə 10-dan çox “Shahed” dronu vurulub.
Yeni model Böyük Britaniyada keçirilən Farnborough Airshow beynəlxalq aviasiya sərgisində nümayiş etdirilib. Şirkət avqust ayından etibarən Jetkiller-in kütləvi istehsalına başlamağı planlaşdırır.
SkyFall bildirir ki, standart P1-SUN modeli 2025-ci ilin noyabrında istifadəyə verildikdən sonra 5 500-dən çox “Shahed” dronunun məhv edilməsində istifadə olunub. Şirkətin istehsal gücü isə ayda 50 minədək dron istehsal etməyə imkan verir.
Bu sahədə fəaliyyət göstərən digər Ukrayna şirkəti General Cherry də “Shahed” dronlarına qarşı nəzərdə tutulan Bullet tutucusunun daha sürətli versiyasını hazırlayır. Şirkətin məlumatına görə, yeni model 400 km/saatdan artıq sürət yığa bilir və gələcəkdə bu göstəricinin 500 km/saata çatdırılması hədəflənir.
Britaniya-Ukrayna şirkəti Firebolt Engineering isə Griffen adlı reaktiv mühərrikli tutucu dron üzərində çalışır. Hazırda bu aparatın maksimal sürəti 350 km/saat təşkil edir. Şirkətin açıqlamasına görə, Griffen may ayında ilk dəfə Rusiyanın qeyri-reaktiv “Shahed” dronunu uğurla məhv edib və hazırda istehsalın genişləndirilməsi istiqamətində işlər aparılır.
Qeyd edək ki, SkyFall daha əvvəl P1-SUN Long modelini də təqdim edib. Bu dron 33 kilometr uçuş məsafəsinə, 9 kilometr uçuş hündürlüyünə və 310 km/saatdan artıq sürətə malikdir. Model süni intellekt əsaslı hədəf aşkarlama və izləmə sistemi ilə təchiz olunub, həmçinin internet üzərindən uzaqdan idarə oluna bilir.
