Venesuelanın prezident səlahiyyətlərini icra edən Delsi Rodrigez ABŞ-la əldə olunan yeni neft razılaşması çərçivəsində ölkənin təbii sərvətləri üzərində mülkiyyət və suverenliyini qoruyub saxladığını bildirib.
Korrekt.az xəbər verir ki, Rodrigezin sözlərinə görə, Vaşinqtonla imzalanan 25 illik “tarixi” müqavilə Venesuelanın təsdiqlənmiş xam neft ehtiyatlarının təxminən 65 milyard barelini əhatə edən 17 strateji yatağın işlənməsini nəzərdə tutur. Razılaşmanın əsas məqsədi ölkənin sanksiyalardan ciddi zərər görmüş enerji sektorunun bərpasıdır.
“Venesuela öz resursları üzərində mülkiyyət və suverenliyini qoruyub saxlayır. Biz strateji sənayenin bərpası üçün kapital, texnologiya və əməliyyat imkanlarından istifadə edəcəyik”, – deyə Rodrigez televiziya ilə yayımlanan çıxışında bildirib.
ABŞ Prezidenti Donald Tramp isə daha əvvəl Vaşinqtonun Venesuelanın təsdiqlənmiş neft ehtiyatlarının “əksəriyyəti” üzərində nəzarəti əldə etdiyini iddia edib. Tramp “Truth Social” platformasındakı paylaşımında razılaşmanı “dünya tarixinin ən böyük neft sövdələşməsi” adlandırıb və bunun ABŞ-ın neft ehtiyatlarını iki dəfədən çox artırdığını bildirib.
ABŞ Enerji İnformasiya Administrasiyasının məlumatına görə, ABŞ-da təxminən 46 milyard barel təsdiqlənmiş xam neft və icarə kondensatı ehtiyatı mövcuddur. Venesuelanın 65 milyard barellik ehtiyatlarının da əlavə edilməsi ABŞ-ın müxtəlif formalarda çıxış əldə etdiyi neft resurslarının həcmini 111 milyard bareldən yuxarı çıxara bilər. Bununla belə, Venesuelanın nefti texniki baxımdan ABŞ-ın daxili ehtiyatlarına daxil edilmir.
Razılaşma Venesuelada ölkənin suverenliyi ilə bağlı mübahisələrə səbəb olub. Ölkənin keçmiş Planlaşdırma naziri Rikardo Hausmann müqaviləni “konstitusiyaya zidd” adlandıraraq, müvəqqəti hökumətin ölkənin neft resursları üzərində uzunmüddətli öhdəliklər götürmək səlahiyyətini şübhə altına alıb.
Keçmiş vitse-prezident və veteran çavist siyasətçi Elias Jaua isə ABŞ-ı Venesuelanı suverenliyindən məhrum etmək və ölkənin təbii sərvətlərinə nəzarəti ələ keçirmək cəhdində ittiham edib.
Qeyd edək ki, ABŞ-Venesuela münasibətlərində son dövrdə neft və digər təbii sərvətlər əsas müzakirə mövzularından birinə çevrilib. Vaşinqtonun Venesuelanın neft satışlarından əldə olunan gəlirlərə nəzarət planları da daha əvvəl gündəmə gəlib.
Bundan başqa, Bloomberg-in məlumatına görə, Venesuelanın altı onillikdən artıqdır üzvü olduğu Neft İxrac Edən Ölkələr Təşkilatından (OPEC) çıxıb-çıxmamaq məsələsini müzakirə etdiyi bildirilir.
Venesuelanın neftlə yanaşı, qızıl və digər strateji mineral ehtiyatları da ABŞ-ın diqqət mərkəzindədir. Ölkənin təbii sərvətləri üzərində nəzarət məsələsi isə Vaşinqtonla Karakas arasında gələcək münasibətlərin əsas istiqamətlərindən biri olaraq qalır.
