Ukrayna Prezidenti Volodimir Zelenski Rusiyanın müharibəni dayandırmaq niyyətində olmadığını bildirib.
Korrekt.az xəbər verir ki, o, ABŞ-ın Fox News telekanalına müsahibəsində deyib ki, Ukrayna, ABŞ Prezidenti Donald Tramp və Avropa ölkələri sülhün əldə olunmasını istəsələr də, Rusiya Prezidenti Vladimir Putin buna maraq göstərmir.
Zelenskinin sözlərinə görə, Kiyev atəşkəsin elan olunması və diplomatik danışıqların başlanması üçün davamlı çağırışlar edir. O bildirib ki, sonuncu dəfə Putinlə 2020-ci ildə danışıb və həmin vaxtdan bəri Rusiya tərəfi dialoqa maraq göstərməyib.
“Biz bu müharibəni dayandırmaq istəyirik. Prezident Donald Tramp da, Avropa ölkələri də bunu istəyir. Lakin Putin müharibəni davam etdirmək niyyətindədir. Biz hər gün, heç olmasa müəyyən müddət üçün atəşkəsin əldə olunmasını və diplomatlara danışıqlar aparmaq imkanı verilməsini xahiş edirik. Amma Putin bunu istəmir”, – deyə Zelenski vurğulayıb.
Ukrayna lideri qeyd edib ki, bu səbəbdən ölkəsi müqavimətini davam etdirməli, güclü və qətiyyətli olmalıdır.
Zelenski Rusiyanın ərazisinə endirilən zərbələrə də toxunaraq bildirib ki, Kremlin döyüş meydanındakı təşəbbüsü zəifləyib. Onun sözlərinə görə, Rusiya hər ay təxminən 30 min hərbçi itirir və buna baxmayaraq müharibəni dayandırmaq istəmir.
Ukrayna Prezidenti həmçinin Rusiyaya qarşı sanksiyaların daha da sərtləşdirilməsinin vacibliyini qeyd edib. O bildirib ki, ABŞ Senatında mərhum senator Lindsi Qrehemin təşəbbüsü ilə hazırlanan sanksiyalarla bağlı qanun layihəsi Kiyev üçün böyük əhəmiyyət daşıyır.
Zelenski ABŞ-a səfəri çərçivəsində Prezident Donald Trampla Ağ Evdə qapalı formatda görüş keçirdiyini də xatırladıb. Onun sözlərinə görə, görüş zamanı Ukrayna üçün “Patriot” hava hücumundan müdafiə sistemləri üzrə tutucu raketlərin istehsalı lisenziyaları, həmçinin Kiyevə dəstək verə biləcək digər təşəbbüslər müzakirə olunub.
Ukrayna Prezidenti əlavə edib ki, görüşdə diplomatik həll yolları və müharibənin dayandırılması istiqamətində atıla biləcək addımlar da gündəmdə olub.
Bundan başqa, Zelenski ABŞ senatorları ilə görüş keçirib və Senatda Rusiyaya qarşı yeni sanksiyalar nəzərdə tutan qanun layihəsinin dəstəklənməsi ilə bağlı müzakirələrdə iştirak edib.
