image-img-20261120-wa0070backend

Azərbaycan və Vyetnam iqtisadi əməkdaşlığında yeni imkanlar və perspektivlər

image-ads-728x90

Azərbaycan ilə Vyetnam arasında iqtisadi əlaqələrin inkişafı, ticarət dövriyyəsinin artırılması, enerji sahəsində əməkdaşlığın genişləndirilməsi və yeni investisiya imkanlarının reallaşdırılması ikitərəfli münasibətlərin əsas istiqamətlərindən birini təşkil edir. Prezident İlham Əliyevin 19 noyabr 2026-cı ildə Vyetnam Xəbər Agentliyinə verdiyi müsahibədə bu sahələrdə əldə olunan nəticələr və qarşıdakı dövr üçün perspektivlər ətraflı şəkildə təqdim olunub.
2025-ci ilin yekunlarına görə, Azərbaycan ilə Vyetnam arasında ticarət dövriyyəsi 150 milyon ABŞ dollarından artıq olub. Bu göstərici iki ölkənin iqtisadi əlaqələrinin inkişaf dinamikasını əks etdirsə də, mövcud potensialın daha geniş olduğunu göstərir. Hər iki ölkənin iqtisadi imkanları, istehsal sahələri, bazarlara çıxış perspektivləri və qarşılıqlı maraqları ticarət əlaqələrinin əhəmiyyətli dərəcədə artırılmasına imkan verir. Energetika sahəsi Azərbaycan-Vyetnam əməkdaşlığının tarixən formalaşmış və bu gün də mühüm əhəmiyyətini qoruyan istiqamətidir. Azərbaycan Dövlət Neft Şirkəti (SOCAR) ilə Vyetnam Milli Neft və Qaz Şirkəti (PetroVietnam) arasında əməkdaşlığın dərinləşdirilməsi bu baxımdan xüsusi diqqət çəkir. 2025-ci ildə imzalanmış Anlaşma Memorandumu neft-qaz yataqlarının kəşfiyyatı və işlənilməsi, texniki xidmətlər, mütəxəssis hazırlığı və digər istiqamətlərdə birgə fəaliyyət üçün imkanlar yaradır. Azərbaycanın enerji sektorunda topladığı təcrübə və Vyetnamın bu sahədəki potensialı qarşılıqlı faydalı layihələrin həyata keçirilməsinə xidmət edə bilər.
İkitərəfli iqtisadi münasibətlər yalnız neft-qaz sektoru ilə məhdudlaşmır. Vyetnam biznesinin Azərbaycan iqtisadiyyatında iştirakına marağın artması müxtəlif sahələrdə yeni təşəbbüslərin ortaya çıxmasına şərait yaradır. “ROX Group”un tikinti, infrastruktur, eləcə də günəş və külək enerjisi layihələrində iştiraka maraq göstərməsi bu baxımdan diqqətəlayiqdir. 2026-cı ilin sentyabrında Bakıda keçirilən İkinci Azərbaycan Beynəlxalq İnvestisiya Forumu çərçivəsində şirkətlə müvafiq sənədlərin imzalanması investisiya əməkdaşlığının konkret layihələr üzərində inkişaf etdirilməsi baxımından əhəmiyyətlidir. Nəqliyyat-logistika sahəsi də iki ölkə arasında iqtisadi əlaqələrin genişləndirilməsi üçün mühüm potensial daşıyır. 2026-cı ilin yanvar-sentyabr aylarında Azərbaycan üzərindən tranzit daşımalarının həcmi əvvəlki ilin eyni dövrü ilə müqayisədə təxminən altı dəfə artaraq 8 min tondan çox olub. Bu dinamika Azərbaycanın beynəlxalq nəqliyyat sistemində artan rolunu və Vyetnamla logistika sahəsində əməkdaşlıq üçün yaranan imkanları göstərir.
Orta Dəhliz və “Şimal-Cənub” nəqliyyat dəhlizi Azərbaycanı müxtəlif regionlar arasında mühüm tranzit məkanına çevirir. Vyetnamdan Avropaya və əks istiqamətdə yüklərin bu marşrutlar vasitəsilə daşınması logistika imkanlarının genişləndirilməsi, ticarət əlaqələrinin sürətləndirilməsi və yeni iqtisadi layihələrin təşviqi baxımından perspektivli istiqamətdir.
Azərbaycan və Vyetnamın enerji, sənaye, kənd təsərrüfatı, investisiya və nəqliyyat-logistika sahələrində əməkdaşlığının genişləndirilməsi üçün mövcud imkanlar kifayət qədər böyükdür. Prezident İlham Əliyevin müsahibəsində vurğulanan iqtisadi prioritetlər göstərir ki, tərəflər əlaqələri yalnız mövcud göstəricilərlə kifayətlənmədən, daha geniş və praktiki nəticələrə hesablanmış əməkdaşlıq modelinə yönəltmək niyyətindədirlər. Bu istiqamətdə görüləcək işlər ikitərəfli ticarətin artmasına, investisiya mühitinin inkişafına və yeni iqtisadi əlaqələrin formalaşmasına töhfə verəcəkdir.

Samirə Hüseynova



image-ads-728x90

  • whatsapp
  • messenger
  • telegram
  • vkontakte
  • odnoklassniki