Prosesin FIFA səviyyəsində böyük bir korrupsiya skandalına (ikinci “FIFA Gate”) çevrilə biləcəyi istisna edilmir.
ABŞ Ədliyyə Nazirliyi və Federal Təhqiqat Bürosu (FBI) Argentina Futbol Assosiasiyasının (AFA) Birləşmiş Ştatlar ərazisindəki yüz milyonlarla dollarlıq maliyyə dövriyyəsini nəzarətə götürüb.
Argentinanın nüfuzlu “LA NACION” qəzetinin eksklüziv sənədlərə istinadən yaydığı məlumata görə, ABŞ-nin federal prokurorları və xüsusi xidmət orqanları AFA-nın beynəlxalq kommersiya müqavilələrindən əldə olunan vəsaitlərin idarə edilməsində ciddi qanun pozuntuları aşkarlayıblar. Araşdırmalar çərçivəsində rəsmi Vaşinqton artıq şahidlərin və şübhəli şəxslərin dindirilməsi prosesinə start verib.
Diqqət mərkəzində olan şirkət və “itkin” milyonlar
Müstəntiqlərin əsas hədəfi Claudio “Chiqui” Tapianın rəhbərlik etdiyi assosiasiyanın xarici sponsorluq müqavilələrini (o cümlədən Adidas və Warner kimi nəhənglərlə kontraktları) idarə edən Florida qeydiyyatlı “TourProdEnter LLC” şirkətidir. Bu şirkət tanınmış teatr prodüseri, keçmiş siyasətçi Javier Faroni və onun həyat yoldaşı Erica Gillette tərəfindən idarə olunur.
Məhkəmə və bank sənədlərindən sızan məlumatlara görə, maliyyə sxeminin əsas detalları aşağıdakılardır:
Ümumi dövriyyə: Şirkət rəsmi olaraq AFA-ya məxsus ən azı 260 milyon ABŞ dolları həcmində gəliri idarə edib.
Şübhəli köçürmələr: Bu vəsaitin 57 milyon dolları heç bir aydın iqtisadi və ya hüquqi əsaslandırma olmadan müxtəlif şirkətlər, kənar benefisiarlar və assosiasiya rəsmilərinin yaxınlarına ötürülüb.
İstifadə olunan banklar: Şəbəkənin ABŞ-nin Citibank, Synovus, Bank of America, JP Morgan və PNC Bank kimi ən böyük maliyyə institutlarındakı hesablar vasitəsilə yüz milyonlarla dollar köçürdüyü təsdiqlənib.
“LA NACION”un qeydi: Şübhəli tranzaksiyaların bir qismi heç bir real xidmət göstərməyən, rəsmi sənədlərdə dövlətdən sosial yardım alan şəxslərin adına qeydiyyatda olan şirkətlərə və AFA-nın digər yüksək rütbəli rəhbəri Pablo Tovigginonun ailə üzvlərinə yönəldilib.
Proses necə idarə olunur?
“Infobae” və digər beynəlxalq media qurumlarının təsdiqlədiyi xəbərə əsasən, işin araşdırılması ABŞ Ədliyyə Nazirliyinin Bank Daxili Dürüstlük Bölməsinin rəhbərləri və Mayami Federal Prokurorluğunun təcrübəli müstəntiqləri (Patrick Gushue, Christopher Ting və Michael Berger) tərəfindən aparılır. Araşdırma hələlik ilkin mərhələdədir və hər hansı rəsmi həbs qərarı verilməsə də, prosesin FIFA səviyyəsində böyük bir korrupsiya skandalına (ikinci “FIFA Gate”) çevrilə biləcəyi istisna edilmir.”AzPolitika.info”
