Ermənistan və Azərbaycana yalnız sabit, hərtərəfli və uzunmüddətli sülh arzulayırıq. Korrekt.az xəbər verir ki, bunu Ukrayna Prezidenti Vladimir Zelenski mayın 4-də Avropa Siyasi Birliyinin 8-ci sammitinin plenar iclasında bildirib.
“Cənab Baş nazir, Sizə və Prezident İlham Əliyevə sülh diləyirik. Bunu hər iki dövlət üçün arzulayırıq”, – deyə o bildirib.
Zelenski bu gün Ermənistanın Avropa ölkələri ilə bir yerdə olmasının vacibliyini vurğuladı. O əlavə etdi ki, Ermənistana səfəri 24 ildə Ukrayna prezidentinin ilk səfəridir və bu, həqiqətən də əhəmiyyətli bir faktdır. Bu, həyata dəyər verənlərin birliyinin miqyasını göstərir.
Zelenski həmçinin Kanadanın Baş naziri Mark Karninin bu sammitdə iştirakını alqışlayıb və qeyd edib ki, Avropa və Kanadanın ortaq dəyərlərini birgə imkanlara çevirməyin vaxtı gəlib çatıb.
“Əziz dostlar, çətinliklər göz qabağındadır. Görürük ki, İrandakı müharibə hələ bitməyib və uzunmüddətli qeyri-sabitliyə səbəb ola və hər kəsin həyat xərclərini artıra bilər. Enerji və təhlükəsizlik sektorlarında əməkdaşlığımız real olmalıdır və bir-birimizə qışa, enerji problemlərinə hazırlaşmaqda kömək etməli və Hörmüz boğazında uzunmüddətli həll yolları axtarmalıyıq”, – deyə Ukrayna prezidenti bildirib.
