Yaddaş Maarifçi Gənclər İctimai Birliyinin nümayəndəsi Azərbaycan Milli Qeyri-Hökumət Təşkilatları Forumunun təşkilatçılığı ilə 27 Sentyabr – Anım Gününə həsr olunmuş toplantıda iştirak edib. Tədbirdə Vətən uğrunda canlarından keçmiş şəhidlərin əziz xatirəsi yad olunub, Azərbaycanın Vətən müharibəsində qazandığı tarixi Qələbənin əhəmiyyəti və ölkəmizin suverenliyinin bərpası ilə bağlı məsələlər müzakirə edilib.
Toplantının əvvəlində Azərbaycan Respublikasının Konstitusiya quruluşunun, ərazi bütövlüyünün və dövlət suverenliyinin müdafiəsi uğrunda həyatlarını fəda etmiş şəhidlərin xatirəsi ehtiramla yad olunub, Dövlət Himni səsləndirilib.
Tədbirdə Azərbaycan Milli QHT Forumunun İdarə Heyətinin üzvləri, müxtəlif qeyri-hökumət təşkilatlarının rəhbərləri, şəhid ailələrinin nümayəndələri və müharibə veteranları iştirak ediblər.
Toplantıda 2020-ci il sentyabrın 27-də başlayan Vətən müharibəsinin tarixi, müharibənin başlanmasına səbəb olan hadisələr və Azərbaycanın 44 günlük müharibədə qazandığı tarixi Zəfər ətrafında fikir mübadiləsi aparılıb. Çıxışlarda əldə olunan Qələbənin ölkəmizin ərazi bütövlüyünün bərpasında oynadığı rol, xalqımızın milli birliyi və Azərbaycan Ordusunun qəhrəmanlığı xüsusi vurğulanıb.
Yaddaş Maarifçi Gənclər İctimai Birliyinin nümayəndəsi bu cür tədbirlərin milli yaddaşın qorunması, tarixi hadisələrin düzgün təbliği və gənc nəslin vətənpərvərlik ruhunda yetişdirilməsi baxımından mühüm əhəmiyyət daşıdığını qeyd edib. Qeyd olunub ki, şəhidlərimizin qəhrəmanlıq salnaməsinin öyrənilməsi və gələcək nəsillərə çatdırılması hər bir vətəndaşın mənəvi borcudur.
Tədbirdə, həmçinin 2023-cü il sentyabrın 19–20-də keçirilmiş antiterror əməliyyatı nəticəsində Azərbaycanın dövlət suverenliyinin tam bərpa olunması, işğaldan azad edilmiş ərazilərdə aparılan bərpa və quruculuq işləri, eləcə də keçmiş məcburi köçkünlərin doğma yurdlarına qayıdışı məsələlərinə toxunulub. Azərbaycanın regionda davamlı sülhün və sabitliyin təmin olunması istiqamətində atdığı addımların əhəmiyyəti vurğulanıb.
Toplantının sonunda 27 Sentyabr – Anım Günü ilə əlaqədar Azərbaycan Milli QHT Forumunun bəyanatı səsləndirilib. Bəyanatda Vətən uğrunda canlarından keçmiş şəhidlərin fədakarlığı, müharibə veteranlarının xidmətləri və şəhid ailələrinə göstərilən diqqət və qayğının davam etdirilməsinin vacibliyi qeyd olunub. Eyni zamanda, Azərbaycanın ərazi bütövlüyünün və dövlət suverenliyinin bərpasının tarixi əhəmiyyəti vurğulanıb.
Yaddaş Maarifçi Gənclər İctimai Birliyi şəhid ailələrinə və müharibə veteranlarına ehtiram göstərilməsini, onların qəhrəmanlıq tarixinin cəmiyyətdə geniş təbliğ olunmasını mühüm ictimai məsuliyyət hesab edir. Təşkilatın mövqeyinə görə, şəhidlərimizin xatirəsinin yaşadılması yalnız anım tədbirləri ilə məhdudlaşmamalı, onların Vətənə sədaqət nümunəsi gənclərin dünyagörüşünün və vətəndaşlıq mövqeyinin formalaşmasına töhfə verməlidir.
Yaddaş Maarifçi Gənclər İctimai Birliyi milli-mənəvi dəyərlərin qorunması, tarixi yaddaşın gələcək nəsillərə ötürülməsi, gənclər arasında vətənpərvərlik hissinin gücləndirilməsi və şəhidlərimizin əziz xatirəsinin daim yaşadılması istiqamətində fəaliyyətini davam etdirir.
Birlik Vətən uğrunda canlarından keçmiş bütün şəhidlərimizin xatirəsini dərin ehtiramla yad edir.
