ABŞ-ın İran sahillərinə yaxın ərazilərdə, xüsusilə Ərəb dənizindəki hərbi-dəniz qüvvələrinin tərkibində son günlər dəyişiklik baş verib.
Korrekt.az xəbər verir ki, ABŞ Hərbi Dəniz İnstitutunun (USNI) məlumatına görə, daha əvvəl bölgədə fəaliyyət göstərən “George H.W. Bush” aviadaşıyıcı zərbə qrupu artıq Ərəb dənizində deyil. Aviadaşıyıcı oktyabrın 4-də Tailandın Pxuket limanına daxil olub.
Hazırda Ərəb dənizində ABŞ-ın əsas aviadaşıyıcı qüvvəsini “George Washington” təşkil edir. Aviadaşıyıcıya göyərtə aviasiyası və “USS Shoup” esminesi də daxildir.
Bölgədə “Boxer” amfibiya hücum gəmisi, “Comstock” və “Portland” desant gəmiləri, həmçinin ABŞ Dəniz Piyadalarının 11-ci Dəniz Ekspedisiya Birliyi fəaliyyət göstərir.
USNI-nin məlumatına əsasən, Ərəb dənizi və ona yaxın sularda “Donald Cook”, “Ross”, “Milius”, “Higgins”, “John Paul Jones”, “Rafael Peralta”, “Michael Murphy” və “John Finn” kimi idarəolunan raket esminesləri də yerləşir. Bölgədə “Miguel Keith” ekspedisiya dəniz bazası gəmisi də fəaliyyət göstərir.
ABŞ-ın Yaxın Şərqdəki hərbi-dəniz qüvvələrinin tərkibindəki dəyişiklik İranla gərginliyin davam etdiyi bir vaxtda baş verir.
USNI News-un sentyabrın 23-də yaydığı məlumatda həmin vaxt “George H.W. Bush” və “George Washington” aviadaşıyıcı zərbə qrupları ilə yanaşı, “Boxer” amfibiya qrupunu müşayiət edən ondan çox idarəolunan raket esminesinin Ərəb dənizi və Hind okeanında fəaliyyət göstərdiyi bildirilirdi.
Hazırda isə “George H.W. Bush” aviadaşıyıcı qrupunun bölgədən çıxarılması ilə ABŞ-ın Ərəb dənizindəki qüvvələrinin əvvəlki tərkibi dəyişib.
Qırmızı dənizdə ABŞ gəmiləri qalır
ABŞ Hərbi Dəniz Qüvvələri Qırmızı dənizdə də hərbi mövcudluğunu davam etdirir.
USNI-nin oktyabrın 5-də yaydığı məlumata görə, hazırda burada “USS Oscar Austin”, “USS Jason Dunham” və “USS Gonzalez” olmaqla üç idarəolunan raket esminesi fəaliyyət göstərir.
Beləliklə, ABŞ-ın Yaxın Şərqdəki hərbi-dəniz qüvvələrinin tərkibində müəyyən azalma və yerdəyişmə baş versə də, Vaşinqton bölgədə mühüm dəniz və aviasiya imkanlarını qoruyub saxlayır.
