İngiltərə Məhsul Təhlükəsizliyi və Standartları Ofisi (OPSS) etiketləmə və izlənəbilərlik tələblərinə cavab verməyən məşhur günəş kremi dəstinin ölkəyə girişinə icazə verməyib.
Korrekt.az xəbər verir ki, ABŞ-dan İngiltərəyə gətirilən “Bubble Cosmetics Günəş Kremi Paketi” etiketləmə standartlarına uyğun olmadığı üçün sərhəddə geri qaytarılıb.
OPSS-in yaydığı rəsmi açıqlamada məhsulun istifadə qaydaları və izlənəbilərlik məlumatlarında çatışmazlıqlar aşkarlandığı bildirilib. Bu səbəbdən məhsul “yüksək riskli” kateqoriyasına daxil edilib və onun İngiltərə bazarında satışına icazə verilməyib.
Etiketləmə tələbləri pozulub
Sarı karton qutuda təqdim olunan məhsulun Avropa İttifaqının 1223/2009 saylı Kosmetika Qaydalarının tələblərinə cavab vermədiyi müəyyənləşdirilib.
Səlahiyyətlilər bildiriblər ki, etiketdəki məlumatların natamam olması istehlakçıların məhsuldan düzgün istifadə etməməsinə və məhsulun tənzimləyici orqanlar tərəfindən izlənilməsində çətinliklərə səbəb ola bilər.
Makiyaj təmizləyicisi də geri çağırılıb
Digər təhlükəsizlik xəbərdarlığında isə “Simple 730 ml Kind to Skin Micellar Cleansing Water” adlı makiyaj təmizləyici suyun bəzi partiyalarında mikrobioloji çirklənmə riski müəyyən edildiyi açıqlanıb.
B&M, Home Bargains və Savers mağazalarında satılan məhsulun geri çağırılmasına qərar verilib.
Geri çağırılan məhsulun barkod nömrəsi 8720181894381, təsirə məruz qalan partiya nömrələri isə 613841 və 613941 olaraq açıqlanıb.
İstehlakçılara həmin partiyalara aid məhsuldan istifadəyə dərhal son vermək və pulun geri qaytarılması və ya məhsulun dəyişdirilməsi üçün aldıqları mağazaya müraciət etmək tövsiyə olunub.
