Oskar mükafatlı aktrisa Syuzan Sarandon Fələstinə açıq dəstəyinə görə Hollivudda iş imkanlarının məhdudlaşdırıldığını və hələ də rollarını itirdiyini bildirib.
Korrekt.az xəbər verir ki, “The Guardian”ın məlumatına görə, 79 yaşlı aktrisa bu barədə Venesiya Film Festivalında yeni filmi “Rezonans Sarayı”nın təqdimatı zamanı danışıb.
Sarandonun sözlərinə görə, Fələstin məsələsindəki mövqeyi səbəbindən bəzi agentliklər və kino sənayesinin nümayəndələri onunla əməkdaşlıq etməkdən yayınırlar.
“Son vaxtlar yenidən işsiz qalmışam. Bəzi agentliklər hələ də insanlara məni işə götürməməyi deyirlər. Amma güc sistemi belə işləyir. Buna baxmayaraq, adi insanlar arasında, xüsusilə də beynəlxalq səviyyədə özümü xoş qarşılanmış hiss edirəm”, – deyə aktrisa bildirib.
Sarandon ABŞ cəmiyyətində İsrail-Fələstin məsələsinə münasibətin son illərdə əhəmiyyətli dərəcədə dəyişdiyini düşünür. Onun fikrincə, insanlar ABŞ-ın İsrailə göstərdiyi maliyyə dəstəyinin miqyasını daha yaxşı anlamağa başlayıblar.
Aktrisa 2023-cü ildə Fələstin tərəfdarı nümayişlərdə çıxış etməsindən sonra uzun müddət əməkdaşlıq etdiyi UTA agentliyinin müştəri siyahısından çıxarılmasını da xatırladıb.
Sarandon hesab edir ki, siyasi mövqeyə görə təzyiq xüsusilə Hollivudun böyük studiyalarında hiss olunur. Onun sözlərinə görə, oxşar problemlərlə üzləşən başqa sənətçilər də var.
Qeyd edək ki, Syuzan Sarandon “Gəzən ölülər” filmindəki roluna görə Oskar mükafatına layiq görülüb. O, “The Rocky Horror Picture Show”, “Bull Durham” və “Thelma & Louise” kimi məşhur filmlərdəki rolları ilə də tanınır.
Aktrisanın yeni filmi “Rezonans Sarayı” Venesiya Film Festivalının əsas müsabiqəsində “Qızıl Aslan” uğrunda mübarizə aparır. Festivalın qalibi sentyabrın 12-də açıqlanacaq.
