İsrail ordusunun atəşkəs rejimini pozaraq Qəzzanın cənub və mərkəzi hissələrinə endirdiyi hava zərbələri nəticəsində üçü polis əməkdaşı olmaqla ümumilikdə dörd fələstinli həlak olub.
Korrekt.az xəbər verir ki, yerli mənbələrin məlumatına görə, İsrailə məxsus pilotsuz uçuş aparatı Qəzza zolağının cənubunda, Xan Yunis şəhərinin qərbində yerləşən əl-Məvasi bölgəsində polis əməkdaşlarının olduğu əraziyə zərbə endirib. Hücum nəticəsində üç polis əməkdaşı həyatını itirib. Yaralananlar və həlak olanların cəsədləri Nasser Hospitala çatdırılıb.
Bundan əlavə, İsrail pilotsuz təyyarəsinin Qəzza zolağının mərkəzində yerləşən əl-Bureyc qaçqın düşərgəsinin girişində, polis bölməsinin yaxınlığında daha bir zərbə endirdiyi bildirilir. Həmin hücum nəticəsində bir nəfər ölüb.
Mənbələr hər iki hücum zamanı çox sayda fələstinlinin yaralandığını qeyd ediblər.
Məlumata görə, 10 oktyabr 2025-ci ildə qüvvəyə minmiş atəşkəs razılaşmasına baxmayaraq, İsrail ordusu Qəzzaya hücumlarını davam etdirir. Son rəqəmlərə əsasən, atəşkəsin qüvvəyə mindiyi tarixdən bu yana İsrailin zərbələri nəticəsində 618 nəfər həlak olub.
2023-cü ilin oktyabr ayından etibarən İsrailin Qəzza zolağına həyata keçirdiyi hərbi əməliyyatlar nəticəsində ümumilikdə 72 mindən çox insanın öldüyü, 172 mindən artıq şəxsin isə yaralandığı bildirilir.
