26 fevral gecəsi Rusiya qüvvələri Ukraynanın Xarkov, Zaporojye və Kiyev bölgələrinə dron və raketlərlə kütləvi hücumlar həyata keçirib. İlkin məlumatlara əsasən, hücumlar nəticəsində təxminən 20 nəfər yaralanıb, yaşayış və qeyri-yaşayış obyektlərinə ciddi ziyan dəyib.
Korrekt.az xəbər verir ki, Xarkov vilayətinə endirilən zərbələr nəticəsində Xarkov şəhərində və Rai-Olenivka kəndində, o cümlədən yeddi yaşlı uşaq olmaqla 14 nəfər xəsarət alıb. Məlumata görə, Rusiya qüvvələri şəhərə 17 pilotsuz uçuş aparatı və iki raketlə hücum edib.
Zaporojye də hücumların hədəfi olub. Regional hərbi administrasiyanın rəhbəri İvan Fedorov bildirib ki, 19 mənzilli yaşayış binası, dörd fərdi ev və bir qeyri-yaşayış obyekti zərər görüb. Hücumdan sonra şəhərin üç rayonunda 500-dən çox ev istilik təchizatından məhrum qalıb. Gün ərzində verilən məlumatları ümumiləşdirən Fedorov qeyd edib ki, Rusiya hücumları nəticəsində bir nəfər ölüb, səkkiz nəfər yaralanıb. Ukraynanın Dövlət Fövqəladə Hallar Xidməti isə gecə saatlarında baş verən hücum zamanı bir nəfərin yaralandığını dəqiqləşdirib.
Paytaxt Kiyevdə ilkin məlumatlara görə, ölən və yaralanan olmayıb. Darnitski rayonunda doqquzmərtəbəli yaşayış binasına ziyan dəyib. Həmçinin Peçerski və Qoloseevski rayonlarında da dağıntılar qeydə alınıb.
Bundan əlavə, Krivoy Roq şəhəri də hücuma məruz qalıb. Regional hərbi administrasiyanın rəhbəri Aleksandr Qanjan bildirib ki, şəhərdə 89 yaşlı kişi və 82 yaşlı qadın olmaqla iki nəfər yaralanıb. Hücumdan sonra ərazidə yanğın baş verib.
Hadisə ilə bağlı araşdırmalar davam edir.
