Sosial şəbəkələrdə özünü həkim və ya stomatoloq kimi təqdim edən, lakin müvafiq tibbi təhsili və peşə fəaliyyəti üçün tələb olunan hüquqi sənədləri olmayan şəxslərin fəaliyyəti cəmiyyətdə ciddi narahatlıq doğurur. İnsan sağlamlığını birbaşa təhlükə altına ala biləcək bu cür hallara qarşı aidiyyəti dövlət qurumlarının nəzarəti gücləndirməsi zəruridir.
Korrekt.az xəbər verir ki, Serhed.az saytının apardığı araşdırmada sosial şəbəkələrdə “Dr.Nargiz.111” adı ilə tanınan, təxminən 50 min izləyicisi olan şəxsin fəaliyyəti ilə bağlı bir sıra ciddi suallar qaldırılıb.
Araşdırmada diqqətə çatdırılan məqamlar həmin şəxsin tibbi təhsili, peşə ixtisası və müvafiq fəaliyyət icazəsinin olub-olmamasının yoxlanılmasını zəruri edir. Bu məsələyə aidiyyəti qurumlar tərəfindən aydınlıq gətirilməsi vacibdir.
Təəssüf doğuran məqam isə ondan ibarətdir ki, sosial şəbəkələrdə formalaşdırılan populyarlıq bəzən peşəkarlıq və tibbi səriştənin göstəricisi kimi qəbul edilir. Halbuki insan sağlamlığı ilə bağlı qərarlar izləyici sayına, reklama və ya sosial media fenomeninə çevrilməyə deyil, real təhsilə, ixtisasa və qanuni fəaliyyət hüququna əsaslanmalıdır.
Daha ciddi narahatlıq doğuran məsələ isə qanunsuz tibbi fəaliyyətə şərait yaradılması ehtimalıdır. Əgər hər hansı şəxsin müvafiq təhsili və icazəsi olmadan klinika açmasına və ya tibbi xidmət göstərməsinə imkan verilirsə, burada təkcə həmin şəxsin deyil, nəzarət mexanizmlərinin də fəaliyyəti araşdırılmalıdır.
Bəzi hallarda müəyyən maddi maraqlar müqabilində peşəkar tələblərə cavab verməyən şəxslərə tibbi fəaliyyət üçün şərait yaradıldığı barədə iddialar da səsləndirilir. Bu iddialar konkret faktlarla yoxlanılmalı, təsdiqini tapdığı təqdirdə məsul şəxslər barəsində qanunvericiliyə uyğun tədbirlər görülməlidir.
Aidiyyəti qurumlar hərəkətə keçməlidir!
Səhiyyə Nazirliyi, Analitik Ekspertiza Mərkəzi və digər səlahiyyətli qurumlar sosial şəbəkələrdə reklam olunan estetik mərkəzlərin, stomatoloji kabinetlərin və müxtəlif tibbi xidmət müəssisələrinin fəaliyyətini diqqətlə yoxlamalıdırlar.
Xüsusilə aşağıdakı məsələlər araşdırılmalıdır:
- “Dr.Nargiz.111” adı ilə fəaliyyət göstərən şəxsin tibbi təhsili və müvafiq ixtisasının olub-olmaması;
- Tibbi xidmət göstərmək üçün qanuni əsaslarının və tələb olunan icazələrinin mövcudluğu;
- Fəaliyyət göstərdiyi müəssisənin qanunvericiliyin tələblərinə uyğunluğu;
- Sosial şəbəkələrdə reklam edilən xidmətlərin real tibbi imkanlara və peşə standartlarına uyğunluğu;
- Qanunsuz tibbi fəaliyyətə şərait yaradılması ehtimalı və buna görə məsuliyyət daşıyan şəxslərin olub-olmaması.
Vətəndaşlar da sosial şəbəkələrdə böyük izləyici auditoriyasına malik olan hər kəsi peşəkar həkim hesab etməməlidirlər. Tibbi xidmətə müraciət etməzdən əvvəl mütəxəssisin ixtisasını, təhsilini və qanuni fəaliyyət hüququnu dəqiqləşdirmək olduqca vacibdir.
Unutmaq olmaz ki, söhbət sadəcə sosial şəbəkə reklamından və ya şəxsi biznes fəaliyyətindən getmir. Söhbət insan sağlamlığından, bəzən isə birbaşa insan həyatından gedir.
Bu məsələ formal yoxlamalarla məhdudlaşmamalı, real araşdırma aparılmalı və nəticələri ictimaiyyətə açıqlanmalıdır. Əgər qanunsuzluq faktları təsdiqlənərsə, məsul şəxslər barəsində qanun çərçivəsində ciddi tədbirlər görülməlidir.
İnsan sağlamlığı reklam vasitəsi, tibbi fəaliyyət isə təcrübəsiz şəxslərin qazanc mənbəyi ola bilməz!
