Korrekt.az xəbər verir ki, ABŞ və İsrail “Dəmir Qübbə” hava hücumundan müdafiə sistemi üçün raket istehsalına başlayıb. “Breaking Defence” xəbər verir ki, Amerikanın “Raytheon” və İsrailin “Rafael” şirkətləri ABŞ ərazisində kəsici raketlərin (Tamir interceptorları) istehsal ediləcəyi yeni zavodu rəsmi istifadəyə veriblər. Zavodun tikintisi 2023-cü ilin sonundan davam edirdi və tərəflər layihəyə ümumilikdə 33 milyon dollar sərmayə yatırıb.
Məlumata görə, İsrail ABŞ-ın maliyyə dəstəyi ilə 1,25 milyard dollar dəyərində Tamir raketləri sifariş edib. Bu məlumat, İsrail Müdafiə Nazirliyinin “Rafael” şirkəti ilə yeni hava hücumundan müdafiə sistemlərinin tədarükü üçün “çox milyard dollarlıq” müqavilə imzaladığını elan etməsindən bir neçə saat sonra açıqlanıb.
İsrailin müdafiə naziri İsrael Katz bildirib ki, bu müqavilə ölkənin hava hücumundan müdafiə qabiliyyətini ciddi şəkildə gücləndirəcək: “Bu tarixi anlaşma, İsrailin təhlükəsizliyini hədələməyə davam edən düşmənlərə qarşı müdafiə imkanlarımızı əhəmiyyətli dərəcədə artıracaq strateji sıçrayışdır.”
“Dəmir Qübbə” sisteminin genişləndirilməsi ABŞ Konqresinin 2024-cü ilin aprelində qəbul etdiyi 8,7 milyard dollarlıq yardım paketi hesabına maliyyələşdirilir. Paketə hava hücumundan müdafiə vasitələri üçün ayrılan 5,2 milyard dollar da daxildir.
Yeni müqavilənin imzalanması mərasimi Təl-Əvivdə Müdafiə Nazirliyinin qərargahında, ABŞ-ın hərbi attaşesi general-mayor Aaron Dreyk və İsrailin ali müdafiə rəsmilərinin iştirakı ilə keçirilib.
