İnsan həyatında bəzən çox qısa müddət yol gedən, amma yaddaşında buraxdığı səssiz iz ömrümüzdən uzun olan müəllimlər… Gününüz mübarək olsun!
Onları hər gün xatırlamırıq. Bəzən adlarını illərin içində yalnız bir anlıq düşünərək yada salırıq. Amma həyatımızın hansısa məqamında onların bir sözü, bir baxışı, bir tövsiyəsi qəfil yaddaşımızda canlanır.
İllər əvvəl söylənmiş bir cümlənin hələ də bizimlə yaşaması müəllimin insan həyatına ən səssiz toxunan, amma ən dərin iz buraxan insanlardan biri olduğunun sübutudur.
Müəllim bir uşağın qarşısında dayanıb sadəcə dərs anlatmır. Bəzən fərqinə varmadan bir taleyin istiqamətinə toxunur. Bir uşağın özünə inamını artırır, bir başqasının içində gizlənən istedadı görür, kiminsə səhvindən sonra yenidən ayağa qalxmasına kömək edir.
Bəzən isə hamının “bacarmayacaq” dediyi bir şagirdə yalnız bir cümlə ilə – “Sən bacararsan” – deməklə onun bütün həyatının axarını dəyişir.
Bu gün informasiya əldə etmək heç vaxt olmadığı qədər asandır. Bir düymə ilə dünyanın ən böyük kitabxanalarına çıxmaq, istənilən sualın cavabını saniyələr ərzində tapmaq mümkündür. Texnologiya inkişaf edir, süni intellekt həyatımızın bir çox sahəsinə daxil olur, öyrənmə imkanlarının sərhədləri genişlənir.
Amma bütün bunların içində dəyişməyən bir həqiqət var: insan insandan öyrənməyə davam edir.
Çünki təhsil yalnız məlumat ötürmək deyil.
Təhsil düşünməkdir, şübhə etməkdir, sual verməkdir, doğrunu yanlışdan ayırmaqdır. Biliklə yanaşı vicdan sahibi olmaqdır. Və bəzən heç bir kitabda yazılmayan ən mühüm qanunu – insan olmağı öyrənməkdir.
Müəllimin əsl gücü də məhz buradadır.
Müəllim olmaq şagirdinə yalnız bir fənnin qaydalarını öyrətmək deyil. Onun dünyaya necə baxacağına, insanlara necə münasibət göstərəcəyinə, uğur qarşısında necə davranacağına, məğlubiyyət zamanı necə ayaqda qalacağına da təsir etməkdir.
Ona görə müəllimin yetişdirdiyi insanın həyatında öz əməyinin izini görməsi onun ən böyük əsəridir. Qarşısında oturan uşağın illər sonra necə bir insana çevrildiyini görmək isə müəllim üçün ən böyük mükafatlardan biridir.
Müəllimin əməyini illər sonra anlayırıq
Həyatın dəyişməyən təzadlarından biridir: uşaqlıqda anlamadığımız bəzi həqiqətləri illər keçdikcə dərk edirik.
O zaman müəllimin niyə bu qədər çalışmalı olduğumuzu, səhvlərimizi düzəltməli, məsuliyyətli olmalı olduğumuzu deməsini bəzən sadəcə tələb kimi qəbul edirik.
Sonra həyat bizi böyüdür.
Və anlayırıq ki, müəllim əslində bizi həyata hazırlayırmış.
Səhv edəndə yenidən başlamağı, çətinlik qarşısında geri çəkilməməyi, başqasının uğuruna həsəd aparmaq əvəzinə öz yolumuzu qurmağı, eşitdiyimizi və bildiyimizi düşünmədən qəbul etmək əvəzinə sual verməyi öyrədirmiş.
Cəmiyyət müəllimə verdiyi dəyər qədər gələcəyə dəyər verir
Bir cəmiyyətin inkişafını yalnız binaları, yolları, texnologiyası və iqtisadi göstəriciləri ilə ölçmək olmaz.
Əsl inkişaf insanın düşüncəsində başlayır.
Düşünən, sual verən, məsuliyyət daşıyan, ədaləti anlayan, öz azadlığının yanında başqasının haqqını da tanıyan insanın formalaşdığı ilk məkanlardan biri məktəbdir.
Məktəbin isə ən böyük dayağı müəllimdir.
Ona görə müəllimə münasibət əslində təhsilə münasibətdir. Təhsilə münasibət isə birbaşa gələcəyə münasibətdir.
Bu baxımdan müəllimin əməyinə hörmət yalnız 5 Oktyabrda bitməməlidir.
Müəllimə verilən dəyər cəmiyyətin ona nə qədər güvəndiyində, əməyini nə qədər qiymətləndirdiyində və təhsili nə qədər prioritet hesab etdiyində görünməlidir.
Gələcəyə açılan sabahımızda hansı cəmiyyətdə yaşayacağımızın cavabı bu gün hansı insanları yetişdirdiyimizdə gizlidir.
Hər kəsin həyatında bir müəllim var…
Hər kəsin yaddaşında canlanan, adını çəkəndə üzündə təbəssüm yaranan, sərtliyi ilə yanaşı qayğısı ilə də xatırlanan bir müəllim var.
Heç vaxt unutmadığınız bir cümləni söyləyən müəllim…
Böyüsək də, zaman və həyat dəyişsə də, yaddaşımızda heç vaxt qocalmayan, taleyimizin memarı olan müəllimlər…
İnsan həyatına özünəməxsus davranışları ilə toxunan, illər əvvəl verdiyi bir məsləhəti bu gün bir insanın qərarında yaşadan, şagirdinin həyatında açdığı kiçik bir pəncərə ilə onun bütün dünyasını dəyişən müəllimlər…
Gününüz mübarək!
Sizin öyrətdiyiniz insanlardan biri sabah başqa bir insanın həyatını yaxşılığa doğru dəyişirsə, deməli, sizin dərsiniz hələ də davam edir.
5 Oktyabr yalnız müəllimlərin deyil, həyatımızda müəllim olmuş bütün insanların günüdür.
Bu gün bizi böyüdən, düşündürən, özümüzə inanmağı öyrədən, bəzən sərtliyi ilə, bəzən bir təbəssümü ilə, bəzən isə sadəcə varlığı ilə həyatımıza toxunan bütün müəllimləri ehtiramla xatırlayırıq.
Həyatın özünü oxumağı öyrədənlər – Beynəlxalq Müəllimlər Gününüz mübarək olsun!
