” Azərbaycan və Serbiya arasında əlaqələrin genişlənməsinin ölkə iqtisadiyyatı üçün vacibdir və bu münasibətlərin Azərbaycanın Avropa bazarına birbaşa çıxışını təmin edəcək. Bu əməkdaşlıq yalnız ticarət əlaqələrinin inkişafına töhfə verməklə kifayətlənməyəcək, həm də Azərbaycanın beynəlxalq iqtisadi əlaqələrini daha da möhkəmləndirəcək.”– bu fikirləri İqtisad üzrə fəlsəfə doktoru və iqtisadçı ekspert Arzuman Muradlı bildirib.
Arzuman Muradlı bildirib ki, Serbiya ilə əlaqələrin dərinləşməsi Azərbaycan üçün həm iqtisadi, həm də siyasi baxımdan strateji önəm daşıyır.
İkitərəfli münasibətlərin daha da güclənməsi, xüsusilə ticarət, investisiyalar və enerji sahələrində yeni imkanlar yaradacaq.
“Serbiya, Azərbaycanın Avropa bazarına birbaşa çıxışını təmin edən mühüm bir körpü ola bilər. Bu, öz növbəsində ölkəmizin iqtisadiyyatını daha da şaxələndirəcək və yeni bazarları fəth etməyə imkan yaradacaq”, – deyə Arzuman Muradlı vurğulayıb.
Bundan əlavə, ekspert Serbiya ilə mövcud iqtisadi əlaqələrin artırılmasının Azərbaycan üçün yalnız iqtisadi fayda gətirməklə qalmayacağını, həm də siyasi müstəvidə ölkəmizin mövqeyini gücləndirəcəyini söyləyib. Azərbaycan və Serbiya arasında qarşılıqlı faydalı əməkdaşlığın genişləndirilməsi, xüsusilə qlobal iqtisadiyyatda baş verən dəyişikliklər fonunda, Azərbaycanın mövcud beynəlxalq əlaqələrini daha da təkmilləşdirməsinə kömək edəcək.
“Serbiya ilə əlaqələrin genişlənməsi, həm də Azərbaycanın regional təsir gücünü artıracaq. Bu əməkdaşlıq, həmçinin yeni enerji və infrastruktur layihələrinin həyata keçirilməsi, kənd təsərrüfatı və sənaye sahələrində investisiya cəlb edilməsi, eləcə də yeni iş yerlərinin yaradılması baxımından böyük potensiala malikdir”, – Arzuman Muradlı qeyd edib.
Ekspertin fikrincə, Serbiya ilə daha yaxın əməkdaşlıq, Azərbaycanın yalnız Avropada deyil, həm də dünya miqyasında iqtisadi gücünü daha da artıracaq. Bu cür əlaqələrin inkişafı, həmçinin Azərbaycanın beynəlxalq arenada mövqeyini möhkəmləndirəcək və ölkəmizin müxtəlif strateji tərəfdaşlarla münasibətlərini daha da şaxələndirməsinə imkan verəcək.
“Bu ikitərəfli əlaqələrin daha da inkişafı, həmçinin regional və qlobal iqtisadi əlaqələrdə Azərbaycanın mövqeyini gücləndirəcək və ölkənin dünya bazarlarında daha rəqabətli olmasına şərait yaradacaq.”– deyə Arzuman Muradlı bildirib.
