Reuters agentliyinin məlumatına görə , ABŞ prezidenti Donald Trampın İrana qarşı yeni təhdidlərindən sonra neft qiymətləri 29 yanvarda dörd ayın ən yüksək səviyyəsinə yüksəlib .
Korrekt.az İnvestisiya portalına istinadən xəbər verir ki ,Brent markalı neftin fyuçersləri 1,21 dollar artaraq bir barel üçün 68,58 dollara çatıb. Amerika WTI markalı neftin qiyməti isə 1,27 dollar artaraq 64,48 dollara satılıb.
Yanvarın 28-də ABŞ prezidenti Donald Tramp İranı nüvə silahı müqaviləsi üzrə danışıqlar aparmağa çağırdı ki, ABŞ-ın növbəti zərbəsi daha şiddətli olmasın. Eyni zamanda, Tehran Vaşinqtonun tələblərinə əməl etmək niyyətində olmadığını açıq şəkildə bildirib.
Bu arada, Reuters mənbələrinə görə, ABŞ rəsmiləri bu həftənin əvvəlində elan etmişdilər ki, Amerika təyyarədaşıyan gəmisi və dəstək gəmiləri Yaxın Şərqə çatıb. Ekspertlər Trampın açıqlamaları fonunda Amerika armadasının Yaxın Şərqdə mövcudluğunun neft qiymətlərini artırdığını irəli sürürlər.
Dünyanın ən böyük neft istehlakçısı olan ABŞ-da xam neft ehtiyatlarının gözlənilməz şəkildə azalması və zəif dollar neft qiymətlərinin artmasına daha da təsir göstərib. ABŞ Enerji İnformasiya Administrasiyası bildirib ki, ölkədə xam neft ehtiyatları 23 yanvarda bitən həftə 2,3 milyon barel azalaraq 423,8 milyon barelə düşüb. Reuters agentliyinin sorğusunda analitiklər 1,8 milyon barel artım proqnozlaşdırmışdılar.
Bu, ABŞ prezidenti Donald Trampın İrana zərbə endirməklə hədələdiyi ilk hal deyil. Yanvarın əvvəlində Amerika lideri bildirib ki, etirazçılara qarşı zorakılıq tətbiq olunarsa, Vaşinqton müdaxilə etməyə hazırdır .
Daha sonra ABŞ prezident administrasiyası daxilində rəsmi Tehrana qarşı mümkün hərbi əməliyyatla bağlı ilkin məsləhətləşmələr aparıldı . Lakin Amerika lideri tezliklə İranda qətllərin başa çatdığını və hərbi əməliyyata hazırlıqların dayandırıldığını elan etdi.
