Böyük Britaniyada keçirilən sınaqlarda beynəlxalq müdafiə şirkəti Thales tərəfindən hazırlanmış RapidDestroyer radiotezlikli enerji silahı (RFDEW) təxminən 80 pilotsuz uçuş aparatını (PUA) uğurla zərərsizləşdirib.
Korrekt.az xəbər verir ki, yönləndirilmiş enerji silahları son illərdə kütləvi dron hücumlarına qarşı daha effektiv müdafiə vasitəsi kimi diqqət çəkir. RapidDestroyer bahalı raket-tutuculardan istifadə etmədən eyni anda bir neçə hədəfi məhv etmək imkanına malikdir.
Sistem güclü radiotezlik impulsları vasitəsilə dronların elektron komponentlərini sıradan çıxarır. Nəticədə pilotsuz uçuş aparatları idarəetməni itirərək uçuşu davam etdirə bilmir.
RapidDestroyer-in son versiyası hədəfə daha çox enerji ötürən dörd panelli effektor ilə təchiz edilib. Bu yenilik sistemin hədəfləri daha dəqiq və effektiv şəkildə zərərsizləşdirməsinə imkan yaradır.
Kompleks radiotezlikli silahı Thales şirkətinin komanda-idarəetmə proqramı və süni intellekt texnologiyaları ilə birləşdirir.
Bununla yanaşı, sistemin bütün əməliyyatları operatorların nəzarəti altında həyata keçirilir.
Mütəxəssislərin fikrincə, RapidDestroyer kimi yeni nəsil müdafiə sistemləri ölkələrin kütləvi PUA hücumlarına qarşı müdafiə imkanlarını əhəmiyyətli dərəcədə gücləndirə bilər.
