Korrekt.az xəbər verir ki, İranın xarici işlər naziri Abbas Əraqçı, Azərbaycanla İran arasında tarixi və mədəni əlaqələrin dərinliyini vurğulayaraq, Araz çayının hər iki sahilindəki xalqların ortaq keçmişinin siyasi sərhədlərlə məhdudlaşdırıla bilməyəcəyini bildirib.
Əraqçı, “Araz Dəhlizi Layihəsi”nin sürətlə irəlilədiyini və “Kəlalə-Ağbənd” körpüsünün açılması ilə iki ölkə arasında beşinci sərhəd keçid məntəqəsinin fəaliyyətə başlayacağını açıqlayıb. Bu addımın, tranzit və ticarət sahələrində yeni imkanlar yaradacağını əlavə edib.
Bundan əlavə, İran XİN başçısı, iki ölkə arasında enerji sahəsində geniş əməkdaşlığın olduğunu və bu əməkdaşlığın gələcəkdə daha da inkişaf edəcəyini qeyd edib. Əraqçı, həmçinin birgə elektrik stansiyalarının tikintisi, iki ölkənin elektrik şəbəkələrinin birləşdirilməsi və Rusiyanın da iştirak edəcəyi üçtərəfli elektrik mübadiləsi layihəsinin planlaşdırıldığını bildirib. Onun sözlərinə görə, bu əməkdaşlıq Qafqazı regional enerji mərkəzinə çevirəcək.
İranın xarici işlər naziri, həmçinin Naxçıvanla qaz mübadiləsini qarşılıqlı etimadın dərinliyinin bir göstəricisi olaraq qiymətləndirib.
Əraqçı, Bakıya səfərini “tarixi qohumluğun möhkəmləndirilməsi öhdəliyinin yenilənməsi” kimi dəyərləndirib və qeyd edib ki, bu görüş iki xalqın parlaq gələcək qurmaq üçün ortaq iradəsinə əsaslanır. O, gələcəkdə sərhədlərin dostluq qapıları, çayların isə əməkdaşlıq mahnıları olacağını bildirib.
