Dünya futbolunun ulduzu Lionel Messi ailəsinin onun həyatındakı rolundan danışıb. Futbolçu bildirib ki, xüsusilə milli komandada uğurların gəlmədiyi çətin dövrlərdə yaxınlarının dəstəyi onun üçün həlledici olub. Korrekt.az xəbər verir ki, bu barədə Fabrizio Romano məlumat yayıb.
Messi deyib:
“Ailə mənim üçün hər şeydir. Çətin anlar olub, xüsusilə milli komanda ilə çox əziyyət çəkdiyimiz vaxtlar… Həmişə yanımda oldular. Barcelonada hər şeyi qazanırdıq, yaxşı oynayırdım, qollar vururdum, sonra milliyə gedirdim və nəticələr gəlmirdi. Məni təhqir edirdilər. Milli formanı hiss etmədiyim, argentinalı olmadığım, artıq oynamamalı olduğum, hətta orada belə olmamalı olduğum kimi sözlər deyirdilər.”
Ulduz futbolçu ailəsinin həmin vaxt böyük psixoloji yük yaşadığını vurğulayıb:
“Ailəm həmin dövrdə həqiqətən çox çətinlik çəkirdi. Məhz o zaman insanların sənə olan həqiqi sevgisini və yanında durduqlarını daha yaxşı anlayırsan. Ailəmin mənə bu qədər yaxın olması üçün həmişə özümü şanslı hiss etmişəm. Həyat yoldaşımın ailəsi də mənə eyni münasibəti göstərib. Bizim birliyimiz hər şeyi asanlaşdırır.”
Messinin sözləri onun şəxsi həyatında ailənin nə qədər güclü dayaq olduğunu bir daha ortaya qoyub.
