İran İslam İnqilabı Keşikçiləri Korpusu (SEPAH) ABŞ və İsraili ölkədə sünni din xadimi Məhəmməd Nezhətinin öldürülməsində iştirak etməkdə ittiham edib.
Korrekt.az xəbər verir ki, SEPAH-ın yaydığı açıqlamada bildirilir ki, Nezhəti İranın şimal-qərbində baş verdiyi iddia olunan terror hücumu nəticəsində öldürülüb.
Korpus hücumun “ABŞ və İsrailin dəstəyi ilə fəaliyyət göstərən separatçı kürd qrupları” tərəfindən təşkil edildiyini iddia edib.
SEPAH hadisənin İranın daxili sabitliyinə zərbə vurmağa yönəlmiş “geosiyasi məqsədlər” daşıdığını bildirib.
Bəyanatda qeyd olunub ki, hücumun məqsədi müsəlmanlar arasında qarşıdurma yaratmaq, şiə-sünni birliyini zəiflətmək və cəmiyyətdə təhlükəsizlik və sabitliyi pozmaqdır.
SEPAH hadisəni “müsəlmanlar arasında nifaq salmaq və cəmiyyəti təhlükəsizlik və əmin-amanlıqdan məhrum etmək üçün çarəsiz cəhd” kimi qiymətləndirib.
Qeyd edək ki, İran tərəfinin irəli sürdüyü ittihamlarla bağlı ABŞ və İsrail tərəfindən hələlik rəsmi açıqlama verilməyib. Həmçinin adıçəkilən kürd qruplarından hər hansı birinin hücuma görə məsuliyyəti öz üzərinə götürüb-götürmədiyi məlum deyil.
Məlumat “Tasnim News”a istinadən yayılıb.
