ABŞ, Venesuela prezidenti Nikolas Maduroya qarşı keçirdiyi hərbi əməliyyatın ardından, 600 minə yaxın venesuelalıyı deportasiya etmək planlarını açıqlayıb. Korrekt.az xəbər verir ki, bu tədbirlər həm də ABŞ-ın Maduro rejiminə qarşı daha geniş əməliyyatının və Vaşinqtonun immiqrasiya siyasətindəki ciddi dəyişikliklərin bir hissəsidir.
Axios-a istinadən yayılan məlumata görə, əvvəllər Venesuelalı miqrantlar, Maduro rejimi dövründəki iqtisadi böhran və insan haqları pozuntularına qarşı qorunmaq üçün ABŞ tərəfindən verilən Müvəqqəti Qorunan Status (TPS) proqramından faydalanırdılar. Lakin Donald Tramp administrasiyası, 2019-cu ilin aprel və noyabr aylarında bu proqramları ləğv edərək, təxminən 616,000 venesuelalının müdafiə hüququnu sona çatdırmışdı.
ABŞ Vətəndaşlıq və İmmiqrasiya Xidmətlərinin (USCIS) sözçüsü Metyu Tragesser bildirib ki, Maduro hakimiyyətdən uzaqlaşdırıldıqdan sonra, venesuelalılar ölkələrinə geri dönüb, vətənlərinin gələcəyini bərpa edə bilərlər. ABŞ Daxili Təhlükəsizlik Departamenti isə Venesuelanın əvvəlkindən daha azad olduğunu bəyan edib.
Müvəqqəti sığınacaq statusu üçün müraciət etmək imkanı olsa da, hazırda sığınacaq müraciətləri dayandırılıb və Venesuela, immiqrasiya üçün uyğunsuz ölkələr siyahısına daxil edilib. Demokrat konqresmen Den Qoldman isə Maduroya qarşı həyata keçirilən əməliyyatın ardından deportasiya uçuşlarının artırılacağını qeyd edib.
Eyni zamanda, Tramp administrasiyası viza məhdudiyyətlərini sərtləşdirərək, Venesuelanı vətəndaşları üçün əlavə şərtlər gətirib. Belə ki, 15.000 dollar qədər viza depoziti tələb edilə biləcək 38 ölkə siyahısına Venesuela da daxil edilib. Bu yeni tələblər 21 yanvarda qüvvəyə minəcək və ABŞ-ın immiqrasiya siyasətini daha da məhdudlaşdırmağı məqsəd qoyur.
