Los-Anceles Şəhər Şurası küçədə top oynamağı cinayət hesab edən qanunu aradan qaldırmaq üçün ilk addımı atıb. Şura üzvləri bu qanunu “istisna dərəcədə absurd” adlandırıblar.
Korrekt.az xəbər verir ki, 1945-ci ildə qəbul edilmiş qanuna görə, səkilərdə və evlərin qarşısındakı küçələrdə futbol oynamaq min dollara qədər cərimə və altı aya qədər həbs cəzası ilə cəzalandırılırdı. Qanun həmçinin valideynləri də məsuliyyətə cəlb edirdi.
Şəhər Şurası yekdilliklə 14-0 səs ilə qərar verərək, şəhər prokurorluğuna qanunun ləğvi üçün layihə hazırlamağı tapşırıb. Şura üzvü Bob Blumenfild qeyd edib ki, uşaqların evlərinin qarşısında və ya məhəllədə futbol oynamasının cinayət sayılması “tam absurddur”. O əlavə edib ki, silahdan atəş açmaq kimi təhlükəli hərəkətlər artıq digər qanunlarla qadağandır və mövcud maddə yalnız gündəlik sadə oyunları hədəfləyirdi.
