ABŞ-ın keçmiş prezidenti Co Bayden rekord məbləğdə pensiya alır. Ekspertlərin hesablamalarına görə, vergilər çıxıldıqdan sonra Baydenin illik gəliri təxminən 417 min dollar təşkil edir ki, bu da onun prezident olduğu dövrdə aldığı maaşı belə üstələyir.
Korrekt.az xəbər verir ki, bu yüksək pensiya paketi Baydenin 44 illik senator fəaliyyəti, vitse-prezidentlik və prezidentlik dövrünü əhatə edən uzunmüddətli siyasi karyerası ilə bağlıdır. O, eyni zamanda bir neçə fərqli dövlət pensiya fondundan ödənişlər alır.
Ekspertlər bildirirlər ki, əgər mövcud qanunvericilikdə nəzərdə tutulan maksimum əməkhaqqının 80 faizlik məhdudiyyəti olmasaydı, Bayden təkcə senatorluq pensiyası üzrə ildə 254 min dollardan çox gəlir əldə edə bilərdi. Bu məbləğə keçmiş prezidentlər üçün nəzərdə tutulan pensiya fondundan alınan təqribən ildə dörddə bir milyon dollar, eləcə də Nazirlər Kabineti katibinin maaşına bərabər ödənişlər əlavə olunur.
Bununla yanaşı, Co Bayden əlavə güzəştlərdən də yararlanır. Buraya ofis sahəsinin saxlanılması, işçi heyətinin maaşları və avadanlıq xərcləri üçün ayrılan kompensasiyalar daxildir. 2026-cı il üzrə bu məqsədlər üçün ayrılan büdcə 1,5 milyon dolları keçib ki, bu da digər keçmiş ABŞ prezidentləri ilə müqayisədə daha yüksək göstəricidir.
Ekspertlər Baydenin vəziyyətini unikal presedent kimi qiymətləndirir və gələcəkdə bu mexanizmin yenidən nəzərdən keçirilə biləcəyini istisna etmirlər. Qeyd olunur ki, Konqresdə əvvəllər prezidentlərin pensiya və imtiyazlarının məhdudlaşdırılmasına dair qanunvericilik təşəbbüsləri irəli sürülsə də, onlar qəbul edilməyib.
Hazırda bəzi qanunvericilər gələcək prezidentlər üçün bu cür “dəbdəbəli” ödənişlərin normaya çevrilməsinin qarşısını almaq məqsədilə islahatların müzakirəsinə başlayıblar.
