Bekhem ailəsində münasibətlərin kəskin gərginləşdiyi bildirilir. Daily Mail-in məlumatına görə, Devid və Viktoriya Bekhemin böyük oğlu Bruklin valideynlərindən onunla yalnız hüquqi nümayəndələr vasitəsilə ünsiyyət qurmağı xahiş edib.
Korrekt.az xəbər verir ki, tərəflərin hüquq komandaları — Schillings və Harbottle & Lewis — arasında məktublaşma aparılsa da, bu yazışmaların rəsmən hüquqi qüvvəsi yoxdur və daha çox xahiş xarakteri daşıyır. Bruklinin tələblərinə, valideynlərinin onunla birbaşa əlaqə saxlamaması və sosial mediada onunla bağlı açıqlamalardan çəkinməsi də daxildir.
Mənbələr iddia edir ki, gərginliyin kökündə Bruklinin səhnəarxası söhbətlərdə həyat yoldaşı Nikola Peltz-Bekhem haqqında səsləndirdiyi xoşagəlməz qeydlər dayanır. Bu müzakirələrdə onun evliliyinin “girovu” olması və həyat yoldaşının tam nəzarəti altında qalması ilə bağlı işarələr yer alıb.
Hadisələrdən sonra Bruklin ailə ilə ünsiyyətini ciddi şəkildə məhdudlaşdırıb. Hər iki tərəfin ictimaiyyətlə əlaqələr üzrə nümayəndələri və yaxın dostları mövzuya ictimai müstəvidə münasibət bildirməməyə çalışır, vəziyyətin emosiyalar səngidikdən sonra həll olunacağına ümid edirlər. Bununla belə, gərginlik davam edir.
İddialara görə, “yalnız vəkillər vasitəsilə danışıq” tələbi Bruklinin Miladdan əvvəl valideynlərini və qardaşları Romeo ilə Kruzu sosial mediada bloklaması ilə nəticələnib. Ailənin Bruklinin mətbəx paylaşımlarını izləməyə davam etməsi isə Bruklin və Nikolanın “tək qalmaq istəyi” ilə ziddiyyət təşkil edib.
Daxili mənbələr bildirir ki, Devid Bekhemə ünsiyyətin yalnız Schillings hüquq firması vasitəsilə mümkün olduğu çatdırılıb. Gənc cütlüyün vəziyyəti sərt qarşıladığı, sosial mediada bir gecədə yeni paylaşımların yayıla biləcəyi qorxusu ilə narahatlıq keçirdiyi deyilir. Bu müddətdə aşpaz Qordon Ramsayın Viktoriya Bekhemi dəstəklədiyi, onu ailə münaqişələri ilə bağlı şəxsi təcrübələrinə istinadla ruhlandırdığı qeyd olunur.
Bruklin 2022-ci ilin aprelində Nikola Peltz ilə evlənib. Cəmi iki ay sonra ailədaxili gərginliklər barədə ilk xəbərlər yayılıb. Səbəblər arasında Nikolanın Viktoriyanın söz verdiyi, lakin tikilməyən gəlinlik paltarına etirazı, mərasim zamanı yaşanan narahat məqamlar və bunların mediaya sızması göstərilir.
Barışıq cəhdlərinə baxmayaraq, Bruklin və Nikola ötən yay Devid Bekhemin 50 illik yubiley məclisinə qatılmayıblar. Bruklin, həmçinin, atasını noyabrda aldığı cəngavərlik tituluna görə ictimai şəkildə təbrik etməyib. Mənbələrə görə, Bruklinin komandası münasibətlərin bərpası üçün səmimi üzr istənilməsinin vacib olduğunu düşünür. Digər tərəfdən, Devid və Viktoriya Bekhem qalmaqalları geridə qoyub irəliləmək niyyətindədir və oğulları ilə əlaqəni bərpa etmək üçün ciddi addımlar atmağa hazır olduqları bildirilir.
