İranın bir çox şəhərində son on gündür ki, milli valyuta olan rialın devalvasiyası və yüksək inflyasiya səbəbindən kütləvi etirazlar davam edir.
Müxalifət mediasının məlumatına görə, 25.000 nəfərlik əhalisi olan İlam əyalətinin Abdanan şəhəri demək olar ki, tamamilə küçə etirazları ilə əhatə olunub.
Korrekt.az xəbər verir ki, etirazçılar ölkənin ali rəhbəri, Ayətullah Xameneiyə qarşı ekstremist şüarlar səsləndirirlər: “Xameneiyə ölüm. Diktatora ölüm”. Bu şüarlara cavab olaraq təhlükəsizlik qüvvələri şəhərdə elektrik enerjisini kəsib.
Ötən axşam etirazçılar bir sıra ticarət obyektlərinə hücum ediblər. Xüsusilə, etirazçılar İslam İnqilabı Keşikçiləri Korpusu ilə əlaqəli olduğu deyilən və korrupsiya və iqtisadi fəaliyyətin simvolu hesab edilən Ofogh Korush şəbəkəsinə məxsus mağazaları yandırıb və talan ediblər.
ABŞ-da yerləşən insan haqları təşkilatlarının məlumatına görə, etirazlar zamanı ən azı 36 nəfər həlak olub. Tacirlərin tətilləri və küçə nümayişləri İranın 92 şəhərindəki 285 rayona yayıldığı bildirilir.
HRANA (İranın İnsan Haqları Agentliyi) 28 dekabrda başlayan etirazlardan bəri ən azı 34 etirazçının və 2 təhlükəsizlik işçisinin öldüyünü, onlarla etirazçının yaralandığını bildirir. Təhlükəsizlik qüvvələri 2000-dən çox insanı həbs edib.
Müxalifət xəbər saytı olan “Iran International”ın verdiyi məlumata görə, İranın sürgündəki vəliəhd şahzadəsi Rza Pəhləvi ölkə miqyasında etiraz aksiyalarına çağırıb.
Bundan əlavə, İranın yeddi kürd müxalifət partiyası və vətəndaş cəmiyyəti təşkilatı birgə bəyanat yayıb və 8 yanvar cümə axşamını ümumi etiraz günü elan ediblər.
Küçə etirazları Buruc, Məşhəd, Cask, Həmədan, Səbzvar, Kermanşah, Lahican və digər şəhərlərdə keçirilib. Nümayişçilər hökumət əleyhinə şüarlarla küçələrə çıxıb.
İran hakimiyyəti etirazlara cavab olaraq quru qüvvələri və sərhəd keşikçilərini göndərib. Etirazları dağıtmaq üçün göz yaşartıcı qaz, rezin güllələr və bəzən də canlı sursatlardan istifadə edildiyi bildirilir.
