Ukrayna Ali Radasının İnsan Hüquqları üzrə komissarı Dmitri Lubinetsin sözlərinə görə, hazırda təxminən 11 milyon Ukrayna vətəndaşı xaricdə yaşayır.
Korrekt.az xəbər verir ki, o, bu barədə jurnalist Dmitri Qordonla müsahibəsində məlumat verib.
Lubinets qeyd edib ki, Ukrayna Xarici İşlər Nazirliyinin rəsmi statistikası daha aşağı rəqəmləri göstərir. Belə ki, nazirliyin məlumatına əsasən, xaricdə olan ukraynalıların sayı 8,5 milyon nəfər təşkil edir. Lakin komissarın sözlərinə görə, bir çox vətəndaş konsulluq orqanlarında qeydiyyatdan keçmədiyi üçün rəsmi statistikada əksini tapmır.
“Diqqət yetirin: 11 milyon Ukrayna vətəndaşı xaricə gedib. Xarici İşlər Nazirliyindən aldığımız rəsmi cavabda bu rəqəm 8,5 milyon göstərilir. Amma başa düşürük ki, bəziləri konsulluqlarda qeydiyyatdan keçməyib və buna görə də dövlət onları statistikada görmür”, – deyə Lubinets vurğulayıb.
Ekspertlərin proqnozlarına görə, ukraynalıların xaricdən kütləvi şəkildə vətənə qayıtması ən azı 2027-ci ilə qədər gözlənilmir. Ukrayna Milli Bankının inflyasiya hesabatında bildirilib ki, geri dönüş prosesi çox güman ki, yavaş tempdə — ildə təxminən 100 min nəfər səviyyəsində baş verəcək.
Məlumata əsasən, ukraynalıların vətənə qayıtma sürətinə ölkədəki təhlükəsizlik vəziyyəti, iqtisadi bərpanın tempi və Avropa ölkələrindəki yaşayış şəraiti ciddi təsir göstərəcək. Hətta müharibənin aktiv mərhələsi başa çatsa belə, yüksək risklər qaçqınların Ukraynaya geri dönməsinə mane olan əsas amillərdən biri olaraq qalacaq.
